Accessibility links

Кайнар хәбәр

Sunami häläqäte kiçergän töbäklärgä yärdäm kürsätü eşläre sülpän bara


Könyaq Aziädä sunami häläqätennän zıyan kürgän töbäklärgä yärdäm eşläre aqrın bara digän borçular sürätendä, İndoneziäneñ Sumatra utrawında bügen qabat cir teträwe küzätelde. İke atna elek bulğan tabiğıy qaza urınnarın qarap yörüçe Berläşkän Millätlär Oyışması citäkçese Kofi Annan düşämbedä Maldiv utrawlarına kilde.

Düşämbedä İndoneziäneñ Sumatra utrawında tağın ber cir teträwe küzätelde. Rixter ülçäme belän 6.2 ball täşkil itkän zilziläneñ üzäge Aceh töbäge başqalası Banda Acedan 60 çaqırım yıraqlıqtağı urınğa turı kilgän. Qorbannar turında älegä mäğlümat yuq. İke atna elek tabiğıy qaza waqıtında bu töbäktä, soñğı sannarğa qarağanda, 100 meñnän artıq keşe häläk bulğan. İñ zur zıyan kürgän bu töbäkkä humanitar yärdäm kiterü eşläre bolay da aqrın bara digän borçular sürätendä, yaña cir teträwe östämä qıyınlıqlar tudırdı. Dikäberneñ 26sında bulğan köçle dulqın taşqını näticäsendä töbäktäge bar yullar, komunikatsiälär cimerelep betkän xäldä. Azıq-tölek, kiräk-yaraqlarnı monda kiterü öçen berdän-ber yul – alarnı boralaqtan taşlaw. Xalıqara Möhacirlek Oyışması wäkile Chris Lom bügen Azatlıqqa Banda Acedan telefon aşa bolarnı citkerde:

Audio (Chris Lom)

"Xäzerge waqıtta oyışma xezmätkärläre häm Amerikan diñgezçeläre boralaqlarnı azıq-tölek belän tutıra. Uzğan atnada töbäkneñ könbatış yarına 150 yök taşlandı. Läkin bu yärdäm bar keşegä dä barıp citäme, äytep bulmıy. Küpme keşe isän qalğanın, alarğa närsä kirägen hawadan açıqlawı qıyın."

Banda Aceh häm Medan hawa alannarında tuplanğan yöklärne taratu öçen Xalıqara Möhacirlek Oyışması maxsus qärwan çeltäre buldırırğa tırışa. Chris Lom süzlärençä, yärdämneñ küläme şaqıty zur bulsa da, bu töbäkne ayaqqa bastıru öçen äle ozaq waqıt kiräk bulaçaq, xäräbä qaldıqları astınnan äle dä casädlär tabıla.

Bügen su, azıq-tölek töyägän Amerikan diñgezçeläre yar buyında urnaşqan häm dulqın taşqını belän tar-mar itelgän Melabu qalasına kilep töşte. Monıñ aldınnan alar berniçä kön İndoneziä xärbiläre belän söyläşülär alıp bardı.

Şri-Lankada, wazğiät äle dä awır buluğa qaramastan, düşämbedä balalar mäktäpkä kitte.

Ul arada Berläşkän Millätlär citäkçese Kofi Annan, qaza illärenä säfären däwam itep bügen Maldiv utrawlarına kilde. Monıñ aldınnan İndoneziä belän Şri Lankada bulğan Annan, oyışmanıñ aşığıç yärdäm genä tügel, ä ozın möddätle yärdäm kürsätergä äzerlegen belderde:

Audio (Kofi Annan)

"Añlawımça, Berläşkän Millätlärneñ häm xalıqara cämäğätçelekneñ sezgä häm başqa illärgä yärdäm itergä teläge zur. Başta aşığıç yärdäm räweşendä, annarı – tözekländerü eşlärendä."

Cakartada Germaniä Tışqı eşlär ministrı Yoşka Fişer, Berlinnıñ, sunami häläqäte kiçergän illärneñ burıçların tuñdırıp toru niäten belderde. Bu turıda ul İndoneziä prezidentı Susilo Bambang Yudhuyono belän oçraşqaç äytte.

-Ali Gilmi
XS
SM
MD
LG