Accessibility links

Кайнар хәбәр

Udmurtiä respublikasınıñ Balezino töbägendä tatar awıllarınıñ kiläçägen qayğırtalar


Balezino rayonı Udmurtiä respublikasınıñ tönyağında urnaşqan. Millättäşlärebez bu cirlärgä inde 17 ğasırda uq kilep urnaşıp, tormış itä başlağan. Bu xaqta Balezino rayonınıñ Kistem awılı ziratındağı qäber taşları da ber dälil bulıp tora. Tatarlar awıl tözep, mädräsä, mäçet salunı möhim eş itep bilgelägännär. Bıyıl Kistem awılı mäçete üzeneñ 100 yıllığın bilgeläp ütärgä äzerlänä. Awıl mäktäbendä bügen dä tatar tele uqıtu däwam itälä. Kistem awılı zurlardan sanala. Bu töbäktä tağın berniçä keçkenä tatar awılı bar. Menä alarnıñ yazmışı qızğanıç xäldä. Bu xaqta äle küptän tügel genä Balezino rayonında oyışqan milli-mädäni möxtäriät räise Räsimä Potanina äñgämäbezdä bolay dide. (audio) Balezino rayonınıñ Äxmädi awılında xäzer başlanğıç mäktäp kenä bar, ul da tizdän yabılaçaq. Balalarnı Yunda awılına uqırğa yörtergä planlaştıralar. Ämmä anda da tatar tele uqıtuçısı wafat bulu säbäple, xäzer tatar tele uqıtılmıy. Dimäk tatar balaları udmurt telen üzläşteräçäk, dip urtaqlaştı Räsimä Potanina. (audio)

Xäzer optimal'läşterü digän deviz astında däwlät säyäsäte bara — keçkenä awıllarda mäktäplär bulmayaçaq, mädäniät yortları şulay uq saqlanmayaçaq — awıllarda qalğan ölkän yäştäge keşelär niçek buldıra ala şulay kön küräçäk. Rayonda inde şuşındıy Biktaş awılı bar. Bügen anda 28 ğailä isäplänä — alarnıñ barısı da diärlek ölkän yäştäge keşelär. Yäşlär yuq, şul uq mäktäp, klub bulmaw säbäple yegetlär-qızlar awılda qalmıy, çitkä kitep tormış qora. Rayonda tatar awıllarında da ruslaştıru protsessı köçle, dip söyläde milli-mädäniät möxtäriäte räise Räsimä Potanina. Möxtariät tatar awılların saqlap qalıp, anda tormışnı canlandırıp cibärü, ğöref—ğädätlärebezne qaytarunı üzeneñ iñ berençe burıçı dip sanıy.

Xämidä Ğayfullina, Udmurtiä
XS
SM
MD
LG