12 ğinwar'da “Piramida” mädäni -küñel açu üzägendä “Tatar cırı-2004” festivaleneñ berençe konsertı uzdı. Festival'neñ bu köne “Yäş yöräklär” cır bäygese ciñüçeläreneñ häm tanılğan estrada yoldızları qatnaşında oyıştırıldı.
Qazanda uza torğan “Tatar cırı” festivaleneñ - bıyıl 5 yıllıq yubileyı. 5 kön baraçaq festival'neñ berençe köne niçek ütüe turında bik küplärneñ işetäse kilä. Çönki bu festival'dä “yäş yöräklär” proyektında ciñüçelär bilgele bulaçaq ide . Häm şuşı ciñüçe yäş cırçılar nindi cırlarnı kemnär belän başqarır ikän digän fiker bik küplärne qızıqsındırdı. Häm bu konsert inde ütte.Bu festival' başqa yıllardan ayırılıp tora. İñ populyar tatar xitların başqaruçılarğa häm avtorlarına tapşırıla torğan “Altın bars” büläk sınına da üzgäreş kertelgän. Ul çista optik pıyaladan , kömeştän, altınnan häm brillianttan tora ikän. Festival'neñ “Altın bars” xalıqara bülägenä inde 4 tapqır iä bulğan häm tağın bıyıl da anı qulınnan ıçqındırırğa telämäwçe Xäniyä Färxi bu konsertnı açıp cibärde.Festival'neñ “Yäş yöräklär” proektında ciñep çığuçılarnıñ häm ataqlı estrada yoldızları belän bergä çığış yasawı da üzençälekle. Tamaşaçı aldında 16 “yäş yöräk” başta üzläreneñ cırları belän çığış yasasa, alarnıñ ikençe cırları duet başqaru ide. Bu duetlar menä niçek qorılğan ide: Aydar Galimov häm Yar Çallıdan- Landış Niğmätcanova;Ğabdelfät Safin häm Başqortstannan İlşatWäliev; Zöfär Xäyretdinov, häm öç qız Qazan, Arça Tübän Qamadan- Rafina, El'wira, häm Regina duetı; Räsim Nizamov häm Çallıdan “Yarda” yegetläre Marat belän İldar; Bulat Niğmätullin häm Balıq bistäsennän -Güzäl Cälalova; Zöhrä Şärifullina häm Alabuğadan- Aygöl Zıyätdinova, Läysän Ğimayıva häm Bulat Cihanşin;Xäniyä Färxi häm Mamadış qızı Gölnara Ğabidullina; Zö-läy-lä törkeme belän Quqmaradan İlnur Sattarov häm Qazannan Ayrat Akimov; Dilä Niğmätullina häm Salawat Miñnexanov; Häm Salawat Fätxetdinov üzendä uqığan 1 häm ikençe kurs şäkertläre Başqortstannan-Baltaçtan- İlüs Ğilmanşin belän annan soñ Tatarstannıñ Ätnä yegete Zöfär Fäxretdinov belän duetı başqarıldı. Tänäfes waqıtında tamaşaçılar fikeren beleştek. Fikerlär törle ide. Şunı da äytep kitärgä kiräkter, rus estradasın qabatlağan cırlar barlıqqa kilgän digän fikerlär bulsa da , Tatarstan häm Başqortstan cırçıları bergä icattaşlıqta başqarılğan cırlarda milli moñnar kübräk çalındı.Tatar cırı 2004 festivaleneñ berençe könendä Yäşlär cırlasa, ä 13 ğinwarda konsert bik küp yıllar buyı säxnädän töşmägän tatar cır sänğäteneñ mäşhür cırçıları qatnaşlığında uzaçaq.
Azatlıq radiosı Mälikä Basıyr Qazan .
