Accessibility links

Başqortstanda da taşlamalarnı beterügä rizasızlıq belderelä


Republíkta ildä başlanğan reformalar säbäple kilep tuğan sosíal kierenkelekne az ğına bulsa da sürelderü maqsatında, Başqortstan xakímítları qayber taşlamalarğa bara başladı. Atnaqiç könne Başqortstan witse-premierı, Xezmät häm xalıqnı sosíal yaqlaw ministerı Fidus Yamaltdinov xezmät veterannarına häm elekke tıl xezmätkärlärenä ay sayın östämä räweştä 100 sum yärdäm bireläçäge xaqında belderde. Ämma mondí ğına şäfqätlelek yärdämgä moxtac pensionerlarnı tınıçlandıra almí älbättä, kiresençä, açuların ğına qabarttı.

Başqortstandağı qayber partílar häm ictimağí xäräkätlär, milli oyışmalar wäkilläre bu könnärdä xaqimimyätlärgä yaña büläk – çirattağı qarşılıq aksísın äzerläw belän mäşğül. Elek xäbär itelgänçä, uzğan atna azağında Ufada häm zurlığı buyınça republíkta ikençe urındağı şähär bulğan Stärletamaqta l'ğotalarnı aqçalata tüläwlärgä almaştıru uñayınnan küp keşe qatnaşlığında qarşılıq çaraları ütkän ide inde. Xäzer Ufada 22 ğínwarda oyıştırılaçaq uram cíınnarında 10-12 meñ çaması keşe qatnaşır dip kötelä.

Kiläse atnanıñ şimbäsendä ütäçäk qarşılıq çarasında qatnaşuçılar xakímítlarğa üz rizasızlıqların nigezdä sosíal kierenkelek uñayınnan citkerer dip kötelä. Ämma uram cíınnarına äzerlek alıp baruçılar republíkta urınnardağı üzidärä oyışmaları citäkçelären saylap quyunı yaqlap ta çığış yasarğa cíına dilär. Başqortstan prezidentı Mortaza Räximov republíkta urınnardağı üzidärä orğannarı başlıqların saylap quyuğa qağılışlı maxsus färmanın uzğan köndä genä imzaladı. Rusiä qanunına yaraşlı eşläde ul monı. Ämma republíktağı oppozísí köçläre Räximov äfändeneñ bu färmanı çın küñeldän, ixlas eşlänmäde, barı tik kiräk bulğanğa ğına eşlände, dip isäpli. «Republík xakímítları moñarçı Başqortstanda bulğan xälne saqlap qalu yaqlı, – dip belderä alar. – Ä älegä qädär urınnardağı üzidärä başlıqları barı tik bilgelänep kenä quyıla ide. Şulay itep, alar räsmi xakímítlar süzennän çığa almí, alar cırın ğına cırlarğa mäcbür. Älbättä, mondí xäl republík citäkçeläre öçen bik tä uñaylı häm anı saqlap qalu öçen alar böten tırışlığın salaçaq». Äle republík rayonnarında häm şähärlärendä üzidärä başlıqların barı tik saylap quyunı ğına yaqlap referendum ütkärü öçen, qultamğalar cíu eşe däwam itä. Barlıq saylawçılarnıñ 3 prosentınıñ imzasın cíu kiräk älege oçraqta. Häm aña waqıt ta bik az qaldı, 28 ğínwarğa qädär ölgerü şart monıñ öçen. Bu eşkä republíktağı qayber partílar häm ictimağí oyışmalar, milli xäräkätlär äğzaları aktíf quşıldı. Läkin bu referendum oyıştırunıñ da uñay näticä birmäwe bar. Urınnardağı üzidärä başlıqların saylap quyunı yaqlağan referendum näticälären räsmi xakímítlar falsifikasílarğa mömkin, digän şik belderä oppozísí köçläre. Şul uq waqıtta Başqortstan citäkçelegenä qarşı matbuğatta törle höcümnär dä däwam itä. Misal öçen, Rusiäneñ Liberäl-demoqratik partísı citäkçeläreneñ berse Aleksey Mitrofanov «ildä sosíal kierenkelek kilep tuuda qayber töbäklärneñ ğubernatorları da turıdan-turı ğäyeple», dip isäpli häm alarnı qulğa alırğa kiräk dip belderä. Şul isemlektä Mitrofanov äfände Başqortstan citäkçelegen dä kiterä. «Ğubernatorlar üzläre milliarderlarğa äylänep bettelär, ä xalıqqa yöz sum aqça östärgä telämilär», dip belderä LDPR wäkile.
XS
SM
MD
LG