İran saqlanu ministrlığı, İrannıñ üzenä qarşı höcümnärgä cawap birer öçen xärbi mömkinlege bar, dip belderde. Cirle mäğlümat çaralarına belderü yasap, ministr Ali Şamxani, "ber genä il dä bezgä höcüm itä almıy, çönki alarnıñ bezneñ xärbi köçebez turında mäğlümatläre yuq" dip belderde.
Älege belderü, kiçä amerikan prezidentınıñ televideniädä yasağan çığışınnan soñ äytelde. George Bush, İran belän nizaqnı diplomatik yullar belän çişergä teläwen äytte, ämma xärbi çara ixtimalın da kire qaqmadı: "Nizaqnı diplomatiä yulı belän çişep bulır, dip ömetlänäm, ämma başqa yullar da bula ala," dide Bush.
AQŞ İrannı yäşren räweştä atom qoralı citeşterüdä ğayepli, Tähran monı kire qağa.
Amerikada çıqqan ber basmada Quşma Ştatlar köçläre İranda yäşren räweştä atom qoralı häm başqa törle xädäflär ezli, digän mäğlümat basılğan ide. Pentagon, tanılğan jurnalist Seymour Hersh yazğan älege mäqäläne – "xata" dip atadı.
Rusiä tışqı eşlär ministrı Sergei Lavrov, İrannıñ atom programması tınıç maqsatlarda qullanır öçen citeşterelä, häm anıñ üzgäräçägenä säbäplär yuq, dip belderde.
