Accessibility links

Кайнар хәбәр

Yalğız anadan kem tua? [ matbuğat küzätüe ]


Matbuğat közgese säxifäsendä iskä alırlıq mäqälälär bu atnada az bulmadı. Ämma alarnıñ kübese tramvaylarnı tuqtatıp, uramnarğa çıqqan pensionerlar belän bäyle. Mintimer Şäymiev tuğan könne 20nçе ğinwarda pensionerlar barlıq transportlarda buşlay yöri başlağaç, ul turıdağı reportajlarnı onıtıp torası kilä.
“Tatarstan yäşläre” gazetasına 22nçе ğinwarda 85 yäş tula. Gazetanıñ qızıqlı tarixı häm xezmätkärläre turında yazmalar şulay uq istä qalırlıq. Ämma iñ şaqqatıra torğan mäğlümatnı “Kiçke Qazan” gazetası birde. Ul “Tatar cırı - 2004” konkursı turındağı mäqälädä Zölfät Xäkim final konsertına kilde häm Altın Bars statuetkasın aldı dip yaza. Çınlıqta Zölfät Xäkimneñ “Yöräk tibeşe” cırı final konsertında taratılğan lazer tälinkäsendä çıqsa da, ul üze bu könne Qazanda bula almadı. Härxäldä Piramidağa kilep, Altın Bars”nı üz qulına töşerergä aña nasıyp bulmadı. Festival'ne oyıştıruçılar qağidäse buyınça, kem Piramidağa kilep, gala konsertta çığış yasamıy, Altın Bars aña eläkmi. “Vostoçnıy Ekspress”ta yazılğança, ul kilep kenä qalmadı, räxätlänep häm bik kileşterep tatarça cırlar başqardı häm xätta tieşle normanı arttırıp ta cibärde. “Altın Bars” aña zurlap tapşırıldı. Menä siña gäzitkä ışan diärgä dä urın bar.
Şulay itep taşlamalar kiselügä räncegän meñnärçä pensionerlar uramda öşep yöregändä, konsert zallarında ikençe tormış baruı turında matbuğat yarışa-yarışa yazdı. Arttırıp cibärülär adım sayın buldı. Qayber mäskäw gazetalarına häm internet säxifälärenä qarasañ, Tatarstanda uram buarğa çıqqan pensionerlar sanı 15 meñnän artıp kitkän. Ämma cirle matbuğatta 300-500 digän sannan da artığı kürenmäde. Distä-meñnärçä demonstrantlar çıqqan Peterburg, Samara qalaların mäğlümat közgesendä Qazan uzıp kitä ikän, dimäk bu közge çalış bulıp çığa.
“Zvezda Povolj'ya” gazetası uzğan atnada Mintimer Şäymiev urınına şuşı yılnıñ axırında uq bulaçaq ictimaği kütäreleş näticäsendä Rafael' Xäkimov saylanaçaq digän ürdäk oçırdı. Çığanağı Mäskäwdäge ber säyäsmän yäğni politolog farazı ikän. Bu atnada “Zvezda Povolj'ya” ireşelgän biekleklärdän çigenmäskä teläwen belderde. Anda yazılğança, Tatarstan fännär Akademiäseneñ yaña prezidentı itep Foat Ğalimullin saylanaçaq ikän. Taşqa basılğaç, çın tügel mikän dip, anı häm Akademiäneñ xäzerge prezidentın ezläp qarağan çaqta, tabıp bulmadı.
Gel säyäsät häm sotsial' tetränülär genä matbuğat közgesendä çağılmıy, älbättä. Bügen bez “Tatarstan yäşläre” gazetasında 20nçе ğinwar sanında basılğan mäqälä belän tanıştırabız. Baltaç rayonında yäşäwçe Färidä Şäkirovanıñ yazması yalğız yäki irsez xatın-qızlarnıñ bala tabıp, üsterüe turında. Andıy balalar xäzer torğan sayın arta. Qayber urınnarda tuuçılarnıñ öçtän ber öleşen täşkil itä.
Ana yalğız ikän dimäk ul cilbäzäk häm yöremsäk digän süz döreslekkä bik turı kilmi dip yaza Färidä Şäkirova. Mäqälä avtorına Qazan sanatoriendä oçrağan yalğız yäş xatın çınlap ta cilbäzäk häm şunlıqtan anıñ häm balasınıñ da yazmışı ayanıç. Ämma yalğız xatınnarnıñ kübese çınlap ta bala öçen yäşi. Mäxäbbät cimeşeme ällä ata- ananıñ yalğışı bulıp tuğan balamı ul, ul barıber keşeçä yäşärgä, ata-ana söyüenä xaqlı, dip sanıy mäqälä avtorı.
Al'bina Zäynulla
XS
SM
MD
LG