Accessibility links

Äfganstanda komandirğa yasalğan uñışsız höcüm tikşerelä başlandı


Atnakiçtä Äfganstannıñ in köçle xärbi komandirlarınıñ berse general Abdul Räşid ed Dostum intixar höcümennän qotılıp qalsa da, anıñ tuğanı häm ike distägä yaqın keşe yaralandı. Taliban süzçese Dostumnı üterü tırışlığı öçen cawaplılıqnı üz östänä alsa da, äfgan räsmiläre bu turıda qarar birü öçen waqıt irtä dip äytä.

General Abdul Räşed Dostumğa yasalğan uñışsız atentatnı 4 keşelek räsmi törkem tikşerä başladı. Şuşı törkemneñ ber äğzası radiobıznıñ Äfgan bülegenä Şebergan şährendä dälillär tuplıybız digän:

(audio) Bez insident bulğan urınnı tikşeräbez, dälil tuplıybız. Kürgänegezçä tikşerü bara.

Taliban süzçese Abdul Latif Hakimi höcüm, 2001 yılda AQŞ citäklägän intervensiä waqıtında Dostumnıñ Taliban suğışçıların üterüdäge role öçen üç alu bulıp tora digän. Yözlärçä Taliban äsire konteinerlarda tranportlağanda hawa citmi tonçığıp ülgän. Bu eş öçen Dostum suğışçıları ğäyeplänsä dä, general bu ğäyepläwlärne här daim kire qağıp kilä.

Äfganstan eçke eşlär ministırlığı süzçese Lutfulla Maşal atnakiçtä bez Talibannın belderüen beläbez, ämma tikşerüçelärgä näticägä ireşü öçen waqıt birelergä tieş digän. General Dostum Äfgan redaksiäsenä birgän ängämädä al Qaida belän belän bäyläneşle terrorçılarnı ğäyepläde:

(audio, Dostum) Min terrorçılarğa qarşı qatı häm ikelänmi suğıştım häm suğışırğa däwam itäçäkmem. Alar Äfganstanda ireklek häm terrorçılarnı beterü tönyaqtan başlağanın belä.Şunlıqtan min häcüm itüçelär al Qaida belän bäyleneşle terrorçı törkemnär dip äytäm

General al Qaida häm Taliban Äfganstanda totrıqlılıq häm tınıçlıq öçen qurqnıç bulıp qala digän.

Germaniäneñ Aachen Universitetında säyäsi fännär profesorı Rangin Sepanta älege waqıtta Qabul Universitetında qunaq profesor. Sepanta Dostumğa höcüm oyıştıruçılarnıñ artında Taliban häm al Qaida taraftarları tora digän qaraşta

Sepanta (audio)

Täcribä şunı kürsätä :Äfganstanda intixar häcümnäre ğädättä Taliban häm al Qaida qullanğan metod.Berbersenä qarşı suğışqan başqa opozitsion köçlär intixar höcüme oyıştırmıy

Dostum köçle citäkçelärdän berse, anı bäğersezlek, säyäsi maceraçılıqta ğäyeplilär häm doşmannarı da küp.

Sepanta 20läp keşeneñ yaralanğan höcüm Äfganstannı totrıqsızlandıru kebek zurıraq mäqsat quydı dip ışana. Sepanta süzlärençä, monda üçalu tügel ä kübräk Äfganstanda wazğiätne totrıqsızlandıru, bigräk tä Dostumğa opozitsiä bulğan tönyaqta xärbi krizis xasıyl itü mäqsatı quyıla.Dostumnıñ üterelüe töbäktä tınıçsızlıq tudıra ala. Bu Taliban vä al Qaidanıñ Äfganstanda alıp barğan säyäsät.

Dostum ,Äfganstanda küptän tügel genä ütkärelgän prezident saylawlarında 4nçe urın alğan ide , ul yaña xökümätkä dä kertelmäde. Anıñ xosusi armiäse ildä barğan demobilizatsiä programmasına qısalarında taratıldı. Ämma generalğa 200tän saqçısı totu röxsäte birelgän. İntixar höcüme bärep töşerelgän Taliban citäkçese Mulla Omarnıñ belderüe belän ber yk waqıtqa turı kilde. Anıñ belderüendä Dostum telgä alınmasa da, Äfganstanda çit il köçläre torğanda tatulaşu bula almıy häm okupatsion köçlärgä qarşı cihad däwam itäçäk dielä.

Äfganstanda ütkän prezident saylawlarında Taliban kisätülären ğämälgä quya almağan öçen qayber küzätüçelär xäräkät ähämäten yuğalta bara digän spekulativ fikerlär beyan itkän ide İkençeläre äytüençä, Dostumnı üterü omtılışınıñ mäqsatı bälkim dä Talibannıñ üzen äle dä isäpkä alınırğa tieşle köç bulıp qaluın kürsätü bulğan.

Färidä Xämit
XS
SM
MD
LG