Ğiraq saylawlarına 10 könnän azraq waqıt qalıp bara. Köç qullanu kimemäde. Bağdadta comğa namazı aldınnan şiğilärneñ Al-Taf mäçete yanında maşinağa quyılğan bomba şartladı, kimendä 14 keşe hälak buldı, 40tan artığı yaralandı.
Başqalanıñ tönyağında ğısyançılarnı ezlägändä ber amerikan xärbie hälak buldı, berse yaralandı. Bağdadnıñ sönnilär küpläp yäşägän bistälärendä 6 ğiraq ğaskärie häm kileşü belän xezmät itkän 3 xärbi üterelgän.
İtaliä tışqı eşlär ministrlığı bügen könyaq Ğiraqta ber italyan xärbieneñ hälak bulğanın xäbär itte.
Qıtay, üzeneñ 6 watandaşınıñ totıq itep alınuı häm ğısyançılarnıñ taläplärenä cawap itep, qıtaylarnı Ğiraqqa barudan tıyılırğa çaqırdı.
Zur öleşe ğısyançılar kontrolendä bulğan Ramadi şähärendä bu suğışçılar ber Ğiraq xärbien asıp quydı, häm başqa xärbilärne dä eşne tuqtatırğa çaqırdı.
Ğiraqnıñ Bäysezlär Assambleyası partiäse citäkçese Saleh al-Aisi, yanawlar säbäple firqaneñ 41 äğzase parlament saylawlarında qatnaşudan baş tarttı, dip belderde. Añarçı şul uq säbäptän Tikrit şähärendä saylaw komissiäseneñ 11 wäkile eştän baş tartqan ide.
Sönni möselmannarı ruxanie Şeix Mahmud al-Sumaidei, ildä iminlek yuq, dip saylawlarnı kiçekterüne sorap möräcäğät itte. Tışqı eşlär ministrı Hoşyar Zebari, Azatlıq radiosına, saylawlar niçek bilgelängän – şulay ütäçäk, dide: "Räsmilär, saylawlar bilgelängän könne ütergä tieş dip sanıy. Äzerlek däwam itä. Bez tawış birüneñ ilneñ böten töbäklärendä, Ğiraq çämğiäteneñ barlıq törkemnäre qatnaşında ütüen telibez. Älege tarixi adımnı yasar öçen ilneñ üzendä söyläşülärne äle däwam itü kiräk , dip sanıym," dide ministr.
Saylaw komissiäse başlığı Adel Allami bügen Azatlıq radiosına, saylaw räsmiläre Ğiraq xalqın tawış birüdä qatnaşırğa çaqıra dip söyläp birde.
