Uzğan şimbädä Pervoural''ski mäçetendä irtädän ük bäyrämçä kütärenke rux xökem sörde. Qorban bäyrämeneñ öçençe köne biredä balalarnıñ şat awazı, küñelle, därtle uyınnar belän başlanıp kitte. Sverdlov ölkäse möselmannarınıñ Qazıylat idäräse oluğ bäyrämne bergäläp bäyräm itärgä dip ölkäneñ şähär häm awıllarınnan balalar çaqırıp kiterde.
İdärä räise Danis xäzrät Däwlätov äytüençä, biregä Raxmanğul, Şäkür, Qantuğan, Äräkäy awıllarınnan, Mixaylovski häm Pervoural''ski şähärlärennän barısı 150 bala cıyılğan.
Raxmanğul awılı mäktäbeneñ tatar tele uqıtuçısı Sämiä xanım söyläwençä, mäktäp balaları arasınnan biregä kilergä teläwçelär küp bulsa da, avtobusqa sıyğança, 25 kenä bala alıp kilä alğannar. Monda kilü xoquqına kübräk qışqı kanikulda seminarğa yörgän balalar iä bulğan. Dini seminarlar turında süz çıqqaç, Sämiä xanım islam dinen öyränüneñ balalarnıñ tärtibenä, uqunıñ sıyfatı yaxşıruğa bik uñay yoğıntı yasawın äytep ütte.
- “Äxlaq däreslärendä alarnı uqıtuçılar belän, äti-änilär belän möğämälägä, ölkännärne xörmät itärgä öyrätälär, - di ul, - Ğomumän, balalarnıñ tärtibe uñay yaqqa bik üzgärde. Ata-analar da bik qänäğät. Yalğış tawışnı kütärep cibärep, axırdan ğafu ütenü oçraqları da bar. Annan soñ islam dine quşqança, bişektän alıp, qäber taqtasına qädär keşe belemgä omtılırğa tieş. Balalarnıñ uquğa mönäsäbäte dä üzgärä”.
Bäyräm uramda şaw-şulı, küñelle uyınnardan başlanıp kitte. Köräk belän qar astınnan “xäzinä” ezläw diseñme, qapçıq kiep yögerü diseñme – berse dä qalmadı. Bit oçları alsulanıp, küzläre ut bulıp yanğan balalar annan soñ mäçet eçenä kerdelär. Biredä dä alarnı citezlektä, tapqırlıqta sınıy torğan törle uyınnar kötä ide.
Şaw-gör kilep törle uyınnar uynağannan soñ, barısı da ber bulıp öylä namazına bastılar. Namazdan soñ balalarğa möselman xatın-qızlarınıñ kiem ürnäklären kürsättelär. Kiemnärne Pervoural''ski mäçetenä gel bulışıp tora torğan “Yevraziä” fondı xisabına tekkännär. Yäş möslimälär älege kiem ürnäklären bik kileşterep, matur itep kürsätä dä beldelär.
Annan soñ barısın da tabın yanına, qorban aşınnan awız itärgä çaqırdılar.
Bäyräm kiçäse dini viktorina belän tämamlandı. İslam dinenä bağışlanğan sorawlarğa cawap birü yarışlarında balalar üzlären küp yaqtan belemle itep tanıttılar. Tapqırlıq buyınça mäktäplär arasındağı yarışta Raxmanğul awılı balaları ciñep çıqtı. Viktorinada ciñüçelärne büläkläw tantanasınnan soñ, tağın şulay oçraşıp torırğa süz quyışıp, qunaqlarnı ozatıp qaldılar.
Fäwiä Safiullina, Yekaterinburg
