Pensioner äbi-babaylarnıñ sotsial tä`eminat oyışmalarında çiratlarında utıruı haman da iñ aktual tema bulıp tora. Fevral öçen aqlarnı inde 24 ğinwarda tüli başlarğa tieşlär ide, ämma haman da ölkännär aqçaların almağan. Däwlät Şurası utırışında Tatarstannıñ sotsial qanunnarına üzgäreşlär kertü töp mäs’älä bulıp tora. 25 ğinwarda däwlät şurasınıñ daimi komissiäläre parlament utırışında qaralası qanunnarnı äzerläp utırdı. Sotsial mäs’älälär komissiäseneñ utırışında da 19 ğinwarda iğlan itelgän qararlardan soñ qanunğa kerteläse üzgäreşlär turında bardı.
Sotsial tä`eminat ministrlığına bu könnärdä añlatmalar sorap küp keşe şaltırata, ämma ğadi pensionerlarğa tügel, iñ ataqlı mäğlümat çaraları xäbärçelärenä dä, ministrlıq xezmätkärlärennän nindi dä bulsa da cawap alu awır. İnde barlıq qızıqsınuçılarnıñ sorawlarına cawap birergä dip sişämbe könne xökümät binasında şuşı sotsial reforma öçen cawaplı törle ministrlıq wäkillär matbuğat oçraşuın ütkärde.Taşlamalarnı aqçağa alıştıru reforması studentlarğa da qağıldı. Alar transportta yörü öçen taşlamalarnı yuğaltqan ide. Ämma ütkän atnada taşlamalar qaytarıldı, häm studentlar qarşılıq çaralarına çığıp tormadı. Xätta qayber yäşlär oyışmaları uramğa çıqqan ölkännärgä yünältelgän säyäsi möräcäğätlärgä qul quydı. Xätta qayber yäşlär zurlar ictimaği oyışmalarına iärep, pensionerlarnı säyäsi provokatsiälärgä birelmäskä çaqırdı. Zur säyäsät belän şöğellänmägän waqıtta, studentlar imtixannar häm küñel açu turında uylana.
Räsmi çaralar bulmasa da, Tatarstan Prezidentı 25 ğinwarda, studentlar könenä turı kiterep Däwlät xezmäte institutına barıp studentlar belän oçraşqan, yäşäw şartları belän qızıqsınğan ikän. Bu xaqta «İntertat» agentlığı xäbär itte. Däwlät oyışmaları öçen xezmätkärlärne äzerläwçe bu institutta sotsial problemalarğa zarlanuçılar yuq ikän. Här xäldä alar turında bik az xäbär itelä. Bu uqu yortı studentları öçen tulay toraq tözelä, ä aşxanäne Prezident açarğa yärdäm itärgä wäğdä itkän.
Barlığı Tatarstanda 250 meñnän artıq student keşese isäplänä. Urtaça stipendiä 400 sum tiräsendä. Studentlarnıñ küpçelege däwlät uqu yortlarında buşlay uqısa, 47 meñnän artıq yäşlär üzläre açqa tüläp belem ala. Stipendiäneñ 100 sumğa arttırılu mart ayında bulaçaq, dip wäğdä itelde. Älegä studentlarğa taşlamalı transport biletı belän qänäğätlänergä turı kilä.
Bikä Timerova
