Mäskäwdä basılıp, xäzer inde böten Rusiädä tarala torğan “Tatarskie novosti” gazetasınıñ bıyılğı berençe sanı dönya kürde. Älbättä, yaña yılnıñ berençe sanı bulğaç qotlawlar da küp kenä gazetada. Rus häm tatar tellärendä basılğan dürtençe häm bişençe bitlärdä urın alğan qotlawlarda bezne millätebezgä tanış bulğan şäxeslär täbrik itä . Alar barısı da redaksiä tarafınnan täqdim itelgän 3 sorawğa cawap birgän. Sezneñ öçen yaña yıl bäyräme närsä ul? Uzğan 2004 yılnıñ iñ tä`sirle waqiğası häm yaña 2005 yıldan närsälär kötäsez? Sezneñ xäteregezdä iñ tirän uyılıp qalğan bäyrämne isegezgä töşerä almassızmı? Şuşı sorawlarğa, Rusiä möftilär şurası räise Rawil Gaynetdin dä, Tatarstannıñ wäkälätle wäkile Nazif Mirixanov ta, gazetanıñ baş redaktorı İlyas Möslimov ta, şulay uq yazuçı Tufan Minnullin, Razil Valeev cırçılar Aydar Galimov häm Zöfär Bilalov belän Zäynäp Färxetdinova da cawap birgän. Ä inde alarnıñ bik qızıqlı cawapların “Tatarskie novosti” gazetasınıñ 1 sanında uqıp belergä bula. Şulay da bu äle gazetanıñ berençe bite tügel, ä inde gazetanıñ berençe bitendä yäğni tışlığında sport, futbol söyüçelärgä tanış bulğan Lokomotiv futbol klubındağı Diniär Biläletdinov fotosı urnaştırılğan. Häm anıñ belän äñgämä gazetanıñ 13 bitenä urnaştırılğan. Gazeta inde ğädäte buyınça häm sanda ber gazeta biten tutırıp bik bilgele millättäşebezneñ fotoräsemen birä. Häm ul şäxes belän äñgämä härwaqıtta da 13 bitkä urnaştırıla. 11 yıl dönya kürü däwerendä gazeta üz uquçısın taptı häm anıñ üz traditsiäläre dä uquçını cälep itä.Gazetanıñ ikençe bitendä härwaqıttağıça räsmi xäbärlär. İkençe bitkä urnaşqan Ramil Sabirov mäqäläse Tatarstan prezidentı Mintimer Şäymievqa 2004 yıl prezidentı dip atalğan Rusiäneñ milli olimpı büläge xaqında söyli. Häm anda Tatarstan prezidentınıñ fotoräseme dä urnaştırılğan. Şul uq bittä gazeta jurnalistı Aliä Sabirovanıñ Federal milli mädäni moxtariät räise Rimzil Valeev belän bulğan äñgämäse urın alğan. Bu äñgämä Mäskäwdä Başqortostan tatarların qorıltayı ütkännän soñ alınğan häm ul “Başqortostan tatarlarınıñ milli mädäni moxtariäte nindi bulır?” dip atala. Äñgämä rus telendä. Gazetanıñ öçençe bite tulısı belän diärlek, Qazanda Bötendöncya tatar kongressı ütkärgän kiñäşmä turında söyli. Bu kiñäşmä waqıtında “Tatarskie novosti” gazetası Bötendönya tatar kongressınıñ «Maqsatçanlıq öçen» digän diplomı belän büläklänüe xaqında da xäbär bar. Şuşı uq bittä gazeta, Böten dönya tatar kongressı belän berlektä iğlan itkän, “Ğaziz xalqım” häm “Listaya stranitsıy proşlogo” dip atalğan ike bäygeneñ şartları belän dä tanıştırğan.
Aldağı bitlärdä Qazan universitı yubileyı uñayınnan yazılğan zur külämle mäqäläne dä uqi alasız. Ä inde tatar dönyası dip atalğan bülektä Avstraliä, Litva , Finlyandiä tatarları turında mäğlümatlar bar. Gazetanıñ 7 bitendä tanılğan ğalim Rafayıl Xäkimovnıñ “Metamorfozı duxa” dip atalğan yaña kitabınnan özek bastırılğan. Ul 8 bittä jurnalist Dinä Alyautdinovanıñ Färit Asadullin belän äñgämäse, “Möselman Mäskäwe” digän kitabı çığuı uñayın basılğan. Gazetanıñ tuğızınçı bitendä “Tatar muzıkasınıñ simvolı” dip atalğan Salix Säydäşev turındağı mäqäläneñ avtorı Al''fred Säydäşev. Ul Böyek tatar kompozitorınıñ tuuına 104 häm wafatına 50 yıl tuldu uñayınnan yazılğan. Şul uq bittä gazetanıñ daimi avtorı Ğömär Bautdinovnıñ soñğı “Böyek möhacir” dip atalğan mäqäläse, İbn Battutanıñ 700 yıllığına bağışlanğan.”Tatarskie novosti” gazetasınıñ yaña yıl sanında şulay uq Mäskäwdä Sara Sadıykova häm Ğaziz Aydarskiğa bağışlap ütkärelgän kiçä turında da, Röstäm Abyazov citäkçelegendäge orkestrnıñ Mäskäwdäge çığışı xaqında da, şulay uq Başqortostan häm Tatarstannıñ atqazanğan cırçı Näzifä Qadıyrova belän äñgämä dä uqi alasız. Gazetanıñ 11 biten tutırıp yazılğan äñgämä Tatar estradısınıñ populyar cırçısı. Faniä Färxi belän. “Yäşlär bite” dip isemlängän, 12 bit tulısı belän Başqortostan yäşlärenä bağışlanğan. 14 bittä Wil Ğanievnıñ tatar telendä külämle “Şağir Därdmänd - milli ğorurlığıbız”dip atalğan mäqäläse isemennän ük kürenep tora. Biredä şulay uq şağir häm anıñ ğailäseneñ fotoräsemnäre dä birelgän. Gazeta tağı küp kenä qızıqlı mäqälälär belän tanışırğa bula. “Tatarskie novosti” gazetası böten Rusiä buyınça taratıla, ni ğäcäpter, ayğa ber genä märtäbä çığuına qaramastan iskermi dä, uqırğa da qızıqlı.
Näzifä Kärimova, Mäskäw
