Mäğlüm buluınça, ğinwar ayında kürenekle şağir Şäyexzadä Babiçnıñ tuuına 110 yıl tuldı. Şuşı uñaydan Tatarstanda da, Başqortstanda da baytaq qına mädäni çaralar ütä.
28 ğinwar könne Başqortstannıñ Mişkä rayonında da tatar häm başqort xalıqlarınıñ urtaq klassik şağireneñ yübileyenä bağışlanğan xäter häm iskä alu çaraları ütte. Ufadan Başqortstan Yazuçılar berlegennän barğan küp kenä tanılğan ädiplär häm sänğät ostaları da qatnaşqan bu çaralar Şäyexzadä Babiçnıñ ätise Möxämmätzaqir Babiçevnıñ tuğan awılı Köygäzetämaq awılında başlanıp kitte. Tantanalarda qatnaşuçılar iñ täwdä Möxämmätzaqir Babiçevnıñ tuğan nigezendäge yort diwarına istälek taqtası urnaştırdı. Annan soñ anıñ qäberenä barıp çäçkälär salu märäsime ütte. Bäyrämdä qatnaşuçılar Köygäzetämaq awılı mäktäbenä dä kerde. Anda Şäyexzadä Babiçnıñ tormış yulına häm icatına bağışlanğan muzey eşläp kilä. Qunaqlar andağı eksponatlar belän yaqınnan tanışa aldı.
Töştän soñ Şäyexzadä Babiçnıñ 110 yıllığı tantanalarında qatnaşuçılar Mişkä rayonı üzägendäge mädäniät yortına kilde. Biredä kürenekle şağirneñ yübileyenä bağışlanğan zur ädäbi-muzıykäl kiçä bulıp ütte.
Ğomumän, bu könnärdä Şäyexzadä Babiçnı iskä alu buyınça bixisäp çaralar ütä Başqortstanda. Ädipneñ tuğan yağı – Dürtöyle rayonı mäktäplärendä häm kitapxanälärendä Şäyexzadä Babiçnıñ icatına häm tormış yulına bağışlanğan maxsus stendlar äzerlände, elektän eşläp kilgän kürgäzmä äsbaplar yañartıldı häm tulılandırıldı. Rayon mäktäplärendä uquçılarnıñ yaqtaş şağir istälegenä äzerlägän kiçäläre häm ädäbiät söyüçelär konferensiäläre äle dä bara.
