Accessibility links

Tatarstan kommunistları: "Rusiä xakimiäten Duması nie belän bergä otstavkağa!"


Uzğan yäkşämbedä, Qazanda, Qamal teatrı binası qarşında, monetizatsiä reformasına qarşı tağın ber miting uzdı. Bu yulı qarşılıq aksiäsen Tatarstan kommunistları ütkärde. Kön salqın buluğa qaramastan xalıq aldan uq cıyıla başladı. KPRF Tatarstan bülege liderları xäzer üzläre, xalıq küzlegennän qarağanda, türälär. Tatarstan parlamentında qanunnar çığarıp utıralar, üzläreneñ fraksiäläre bar. Şuña kürä miting başlanğançı uq alarnı xalıq çornap alıp soraw “utına” tottı. Oyıştıruçılarnıñ berse Robert Sadıyqovqa xalıq bik qıyın sorawlar birde. Nigä kompensatsiälär aldan wäğdä itelgännän küpkä az? Nigä xalıq bitaraf? Nigä deputatlar bitaraf? Nigä cämğiätneñ äxlaqi xäle naçaraya? Nigä narkomaniä taraluğa yul quyıla? Sorawlar küp, ämma kommunistlarnıñ cawabı ber- monıñ barısında da xäzerge säyäsi rejim ğayıple. Kommunistlar cıyğan mitingka da başqa firqälär, xäräkätlär, oyışmalar wäkilläre kilde. Bu xäzerge qarşılıq aksiäläreneñ üzençälege. Monetizatsiä reforması xalıqnıñ iñ çıdam, iñ sabır qatlamın quzğattı. Bolar “suğış qına bulmasın” dip yäşäwçe pensionerlar häm “allağa şöker eşlärgä eşem, aşarğa aşım, kiärgä kiemem bar” dip däşmi tınmıy yörgän uqıtuçılar, tabiplar, urta qul xezmätkärlär. Xättä pensiäse, xezmät xaqı citkän keşelärne balalarınıñ kiläçäge borçıy. Mitingta qatnaşuçı ber xanım “Azatlıq” radiosı tıñlawçılarına mitingta berençe tapqır yäşlärneñ kiläçäge bulmağanğa borçılıp çığuı turında äytte. Şulay itep monetizatsiägä qarşı ütkärelgän aksiälärneñ tağın ber üzençälege- monda äytäse süze cıyılğan keşelär çığa. Alar jurnalistlarğa üzläre kilep söylilär häm “monı zinhar işetteregez” dip ütenälär.

Monetizatsiägä qarşılıq nigezendä Tatarstandağı säyäsi-ictimaği oyışmalarnıñ berläşüe real'' äybergä äylänep bara ikän. Moña Robert Sadıyqov açıqlıq kertte häm Tatarstandağı säyäsi-ictimaği oyışmalarnıñ berläşterelgän oyıştıru utırışı uzuı häm yegerme biş wäkildän torğan şura saylanuı turında äytte. Kommunistlar mitingısınıñ rezolyutsiäsendä dä xalıqqa qarşı ütkärelgän reformalarda ğämäldäge “säyäsi rejim” ğayeplände häm Rusiä xökümäteneñ, Däwlät Dumasınıñ otstavkağa kitüe taläp itelde.

Yunıs Ätnäle

XS
SM
MD
LG