«Tatarskaya gazeta» internet säxifäse häm anıñ citäkçese İrek Bikinnin iseme belän bäyle bulğan «Yıl tatarı» bäygese, bu könnärdä, başqa sayt häm başqa keşe iseme belän telgä alına başladı. Bu xaqtağı yazu, Tatarlar.ru saytında, soñınnan İrek Bikinnin gäziteneñ konferensiä bülegendä basılıp çıqtı. Eş şunda, www.tatarlar.ru säxifäse «Yıl tatarı» häm «Yıl tatar xatın-qızı-2005» isemenä layıq keşelärne belü öçen soraştıruda qatnaşırğa çaqırdı. www.tatarlar.ru/new/060205.html Säxifäneñ baş möxärrire Timur Söläymanov ni säbäple bu eşkä barğanın ber niçek tä añlatmıy, barı tawış birergä genä täqdim itä. Moña qädär bu bäyge belän şöğellänä torğan İrek Bikininnin, «Bez uylap tapqan äyberne urlağannarmı?», dip qänäğätsezlek beldergän ide. Timur Söläymanovanıñ fikeren älegä belep bulmadı. Niçek kenä bulmasın, tawış birü başlandı häm 11 fevral’gä anda inde 200 artıq keşe qatnaştı. İsemlekkä 15 keşe kertelgän. Ar-atlar häm xatın-qızlar ayırılmağan, barı ber genä keşegä tawış birergä röxsät itelä. İsemlektä säyäsätçelär Fändäs Safiullin häm Vil Mirzayanov, cırçılar Rinat İbrahimov, Cämilä Nizametdin, Zulya Kamalova häm Mälikä, muzıkantlar Aydar Ğäynullin häm Deniz Bädertdin, kino häm teatr artistları Çulpan Xammatova belän Marat Başarov, keçkenä qızlar arasında dönyanıñ iñ çibär qız Daniä Ğöbäydullina, däwlät eşleklese Zilä Wälieva, tennisçı Marat Safin, mäşhür xäzrät Şamil Alautdin da bar. Tawış birü äle 1 genä atna bara, ämma berençe nämzätlärne inde çamalap bula. Älegä berençe urında Cämilä Nizametdin bara, ul 26% tawış cıyğan, annan soñ, tennisçı Marat Safin häm säyäsätçe Fändäs Safiullinınıñ internetçılar mäxäbbäten yawlağannarı kürenä, alarğa 17 häm 13 % tawış birelgän. Ägär sez dä, tawış birüdä qatnaşırğa telisez ikän, tatarlar.ru säxifäsendä «Tatarin goda» digän bäygene ezlätergä kiräk. Tatnet tapşırunıñ aldağı çığarılışlarında, «Yıl tatarı-2005» bäygese tiräsendä tuğan sorawlarğa cawap tabıp, bu temağa äylänep qaytırbız.
Tatnet yañalığı. Tatar internet säxifälär isemlegenä tağın 2 sayt kilep quşıldı. Berse seber tatarlarınıñ yaña internet säxifäse bulsa, ikençese - başqortstan tatar yäşläre gäziteneñ internettağı saytı.
Seber tatarları saytı www.sibtatar.t5.ru adresında urnaşqan. Säxifä älegä urıs telendä genä eşlängän, ämma kiläçäktä sayt xucaları anıñ tatarçasın da yasap quyarğa wäğdä itälär. www.sibtatar.t5.ru saytınıñ kereş bitendä, bu säxifäne oyıştıru maqsatı turında 1-2 cömlä yazılğan. Könçığış häm Könbatış Seberdä yäşäwçe tatarlar ber berse belän aralaşsın häm tanışsın, qızıqsınğan sorawlarğa cawap taba alsın öçen, bu sayt barlıqqa kilde, dielä anda. Älegä barlıq sorawlarğa da, cawap tabıp bulmıy, çönki Seber tatarları saytı äle tulılanıp betmägän. Anıñ qarawı, forum häm tanışular bülege tulı qüätkä eşläp kilä. Tatar yegetläre belän tanışırğa telägän Tömän qızları üzläre turında mäğlümat qaldırıp kitkän, ä yegetlär tanışularğa bik qızıqsınu kürsätmi, säxifädä barı 4 Tömän yegete genä terkälgän. Saytta başqa töbäk yäşlärenä dä üz ara tanışırğa bula, adresnı qabatlıy www.sibtatar.t5.ru
İkençe yaña açılğan sayt, «Ömet» tatar gäziteneñ internet versiäse bulıp çıqtı. Anı sez www.omet-ufa.ru adresındağı säxifädä taba alarsız. Elektron gäzittäge tekstlar tatarça-kirilça xäreflär belän birelä.Bikä Timerova.
