1989-yılnıñ 30-dekaberendä “Ömet” gäziteneñ 1-sanı dönya kürgän ide. Anıñ 15 yıllığına bağışlanğan çaralar qayber awıl-qasabalarda uzdı inde. Bu yulı redaksiä üze urnaşqan bina zalında 60qа yaqın iñ yaqın dusların, aktiv xäbärçelären çäy östälenä cıydı. 23 yäşendä redaktor wazifalarına cigelgän İsxaq Xälimev kiçäne açıp cibärü aldınnan anıñ maqsatın da añlattı: “Bu oçraşuda uzğan 15 yıllıq eşkä näticä yasarğa buldıq. Bergäläp kiñäşläşik: niçek “Ömet” gäziten, izge ana telebezne saqlap qalırğa?”
“Ömet” belän ayıruça tığız xezmättäşlektä torğan 10 xäbärçegä İsxaq Xälimev redaksiäneñ Räxmät xatları häm keçkenä büläklär tapşırdı. Ä tanılğan cirle şağirebez Rifqät Xismätkä 2004-yıl öçen Säxab Urayski isemendäge premiä laureatı tanıqlığın da. Rifqät äfände isä räxmät xislären şiğri yullar belän citkerde.
Älbättä, mondıy çaralarda maqtaw süzläre küp urın bili. Bu bäyräm küplärne ilhamlandırğan, küräseñ: çığış yasawçılarnıñ küpçelege şiğri süz tottılar. Pionerlar bulıp kiengän äbi-babaylar törkemeneñ şayarışlı şiğerläre ayıruça tä'sirle buldı. Ä inde uqıtuçılar, milli xäräkät citäkçeläre alda torğan citdi burıçlarnı, teläk-täqdimnärne şiğri yullarğa sıydıra almağannar.
Citdi süzlär küñel açu çaraları belän çiratlaşıp bardı. Tanılğan cırçılarıbız Rinat Sadıyqov häm Alsu Tuqtarova cıyılğannarnı milli moñıbız belän sıyladılar. Xäyer, ğomum cır-iyüllär dä buldı.
“Tuğan tel” oyışması häm “Ömet” gäzite oyıştırğan här çara xalqıbıznıñ gimnına äylängän “Tuğan tel” cırı belän tämamlana. Ä bu yulı “Tuğan tel”dän soñ Zelenaya Roşça isemle qatnaş xalıqlı awıl imamı Mäxmüt xäzrät Kadraliev, tabınnı zurlap, barçabızğa iminlek häm uñışlar, ä “Ömet”kä ozın ğömer teläp, kiçäne doğa belän tämamladı.
“Azatlıq” radiosı, Ayrat İbrahim, Sember.
