Accessibility links

Кайнар хәбәр

Ğaşura könendä Ğiraqta şartlawlar näticäsendä distälärçä keşe hälak buldı


Bügen şığıy möselmannarnıñ iñ izge könnärennän berse bulğan Ğaşura köne. Möxämmät päyğambärneñ onıqlarınnan berse İmam Xösäinneñ 7-nçe ğasırda kiçergän ğasapları Ğaşurada iskä alına. Kerbalada İmam Xösäin mäçete yanına ğibadät qılırğa kilgän distälärçä meñ şığıy üz kükräklärenä suğa suğa şiğarlär qıçqırdı.

Kerbalada häm Bağdadta bıltırğı Ğaşura yolası könnärendäge xällärgä yul quymaw öçen iminlek çaraları köçäytelde. Bıltır intixarçı şartlatuçılar 170-tän artıq keşene ütergän ide. Qatı iminlek çaralarına qaramastan bügen berniçä şartlaw buldı. Bağdadnıñ Xädämiä rayonında şığıylar mäçete yanında bombalı aftobus şartladı. Politsiä äytüençä 17 keşe ülgän, 46 keşe yaralanğan. Xädämiä törbäse yanında intixarçı iminlek köçläre belän atıştan soñ bomba şartlatıp üzen häm ike keşene, şul isäptän AQŞ soldatın üterde. Baquba şähärendäge Ğiraq däwlät saqçıları bazası yanında maşinağa quyılğan bomba şartlap ber ğiraq saqçısın häm ber sivil keşene üterde. Bağdadta qorallı keşelär ber cenazada qatnaşuçılarğa ut açıp berniçä keşene yaraladı. Başqa ber cenazada qatnaşuçılar arasına ber intixarçı mototsikl belän kerep bomba şartlattı. Näticädä 4 keşe hälak buldı, 40-lap keşe yaralandı. Bu cenazada qatnaşuçılar comğa könne başqa ber intixarçı şartlatıp ütergän xatın-qıznı cirläw öçen cıyılğan bulğan. Xämit Räşit Talal isemle ber şahit äytüençä bügenge şartlaw qorbannarı arasında ul xatınnıñ tuğannarı da bulğan.

AUDİO: Şartlatuçı monda uq kerep üzen şartlattı. Ul monda şartladı, mototsiklı tegendä qädär oçtı. Ülgän xatınnıñ ire, ike ulı, ber tuğanı häm ike onığı da hälak buldı. Bu bik zur yuğaltu buldı.

Bıyılğı Ğaşura yolası Şığıylar İttifağınıñ Ğiratqa Säddan Xösäin çorınnan soñğı berençe saylawlarda ciñügä ireşüe iğlan itelgännän soñ berniçä kön ütügä turı kilde. Distälärçä yıl Säddam xakimiättä torğan Ğiraqa xäzer xakimiät ildä küpçelekne täşkil itkän şığıylarğa küçä. Saylarlardan soñ şığıylar belän sönnilär arasında kierenkelek arttı. Küplär bu höcümnärne sönni möselmannar watanfaşlar suğışı çığaru maqsatı belän yasıy di. Şığıy citäkçelär berniçä märtäbä, andıy höcümnärgä üç alu höcümnäre belän cawap birmäskä çaqırdı.

Naif Aqmal, Praga.
XS
SM
MD
LG