Accessibility links

Кайнар хәбәр

İzrail'' xökümäte premyer ministr Ariel Şaronnıñ Gaza sızığındağı yähüd bistälären çigerü planın rasladı


Xökümät 17-gä 5 tawış belän Şaron planın xuplap, qarşı çığuçılarnıñ referendum ütkärü tırışlıqların ciñge. Xökümätneñ atnalıq utırışın açıp Şaron bu plan İzrail''neñ kiläçäge öçen xälitkeç ähämiätkä iä dide.

AUDİO: Xökümät bügen Fälestinnän beryaqlı ayırılu planındağı bistälärne küçerü mäs''äläse turında qararnı tikşerä. Bu ciñel kön tügel, bu bäxetle kön tügel. Gazadağı häm tönyaq Sämäriädäge bistälärne küçerü bik qıyın adım. Bu anda yäşäwçelär öçen qıyın, İzrail'' watandaşları öçen qıyın, minem öçen qıyın. Älbättä bu xökümät äğzaları öçen dä qıyın. Ämma bu İzrail''neñ kiläçäge öçen xälitkeç adım.

Şaron planı İzrail''lelär tarafınnan da fälestinlelär tarafınnan da tınıçlıqqa taba iltergä mömkin adım dip bäyälänä. Bu ayda Qahirädä ike yaq citäkçeläreneñ üzara höcümnärne tuqtatu turında kileşüe dä ömetne arttırdı.

Gazadağı bistälärne häm Könbatış Yardağı 120 bistäneñ 4-sen küçerü planı xökümättä raslanğannan soñ 5 ay eçendä anda yäşäwçelär yortların buşatırğa tieş.

Kileşergä telämäwçelär 1967-nçe yılğı Yaqın Könçığış suğışında İzrail'' basıp alğan cirlärne fälestinlelärgä qaytaruğa qarşı çığa. Ämma fiker beleşülär İzrail''däge küpçelekneñ Şaron tädim itkän çigenü planın yaqlawın kürsätä. İzrail'' kiñküläm xäbär çığanaqlarına qarağanda härber bistäne küçerüdä 6 meñläp qoralsız xärbi häm politsiä xezmätkäre qatnaşaçaq. Ul bistälärdä yäşäwçelär citäkçeläre köç qullanmıy ğına qarşılıq kürsätergä çaqırdı. Ämma İzrial'' iminlek xezmätkärläre äytüençä çigereläçäk bistälärdä yäşäwçe yähüdlär belän xärbilär arasında qan qoyu da bulırğa mömkin. Gaza sızığında 8 meñ 500 yägüd häm 1 million 300 meñläp fälestinle yäşi. Könbatış Yarda 230 meñ yähüd häm 2 million 300 meñläp yähüd yäşi.

Naif Aqmal, Praga.
XS
SM
MD
LG