Bu xaqta könyaq İzraeldäge Ketziot törmäsendä Xärbi Polisiä başlığı Mickey Barel belderde.
"Xärbi polisiä Gaza häm Könbatış yarnıñ 5 cirendä barlığı 500 keşene irekkä çığardı. Böten äzerleklär uñışlı uzdı. Añarçı totqınnar belän Qızıl Xac xezmätkärläre oçraştı, dide polisiä başlığı.
Elekke totqınnar tikşerü üzäklärenä kiterelep Fälestin xakimiäte wäkillärenä tapşırıldı.
Kiçä İzrael parlamentı premyer-ministr Ariel Şaronnıñ Gaza sızığı häm Könbatış Yardan çığu turındağı planın xupladı.
Fälestin premyer-ministrı Ahmed Qureia bügen parlamentqa yaña ministrlarnı täqdim itte, ämma küpçelekneñ alarğa qarşı çığuı säbäple utırış irtägä qadär kiçekterelde. Deputatlar Fälestin xakimiäten – reformalar ütkärü häm korrupsiägä qarşı çaralar kürmäwdä ğayepli başlağaş Qureia berniçä tapqır mikrofonnı özgän, dip xäbär itelä.
Ägär dä Qureia täqdimen deputatlar xuplamasa – bu artqa kiteş bulaçaq, fälestin prezidentı Mahmud Abbasqa yaña premyernı bilgelärgä kiräk bula.
