Accessibility links

Кайнар хәбәр

Norlat rayonında säyäsi oyışmalarğa 14 yäştän qabul itälär


22 fevraldä yäşlär eşläre häm sport ministrlığı yıllıq utırışın ütkärde. 2004 yılda ministrlıq yäşlärne toraq häm eş belän tä’min itü, festival, KVN, sport yarışlarnı oyıştıruğa zur iğtibar birde, dip iğlan itelde. Yäşlär eşläre häm sport ministrı Marat Bariev eşlägän eşlär turında xisap tottı. Ütkän yılda, toraq aluda yäş ğailälärgä däwlät yärdämen kürsätü programmasına zur iğtibar birelgän. Xisapta niçä ğailäneñ 2004 yılda toraq ala aluı turında sannar kürsätelmäde, anıñ qarawı, finanslaw kirägennän 4 tapqırğa kimräk buldı, dip äytelde. Yäş ğailälärgä toraq aluğa däwlät programması qısalarında 20 meñ yäş ğailä tora, dip xäbär itelä. Yäş ğailälärne toraq belän tä’min itü digän federal programma da Tatarstanda eşli ikän, anıñ nigezendä 2 yıl eçendä 395 ğailä toraq öçen kreditnı tülärgä subsidiä alğan. Awıl cirendä yäş ğailälärgä rayon xakimiäte tözeleş materialları, 10-20 meñlek kredit birep, yortlarnı tözep beterergä yärdäm itä. Finans yärdäm bik az külämdä birelä, ämma alay eşlägändä kübräk ğailälärgä yärdäm birergä mömkinlek tua, statistik sannar da kübräk kilep çığa. Baltaç rayonında şulay eşlänä.

Baltaç häm başqa rayon wäkilläre, cıyılışta bulğan xökümät räise Röstäm Miñnxanovqa möräcäğät itep, yäşlär toraq programmasın betermäskä ütende. Xökümät räise, sotsial ipoteka üz urınında, bu programa uz urınnda qala, dip cawap birde. Norlat rayonı başlığı Fatix Sibğatullin, yıllıq utırışta yalqınlı çığış yasap, yäşlärne tärbiäläw häm sportnı üsterü yulları turında fikerläre belän büleşte. Yäşe 18gä citmägän balalarnı, yäşlärneñ säyäsi-ictimaği oyışmalarına almıylar. Bu mäs’äläne Fatix Sibğatullin üz rayonında xäl itkän. Anda xakimiät firqäseneñ yäşlär qanatına, «Yäşlär berdämlege» oyışmasına 14 yäştäge balalar da kerä, barlığı anda 2000 meñ yäş keşe tora.

Cıyılışta massaküläm sportnı üsterü turında da süz bardı. Täcribäle trenerlarğa citärlek eş xaqı tüli almıybız, şuña bıyılğı Olimpiadada Tatarstan sportçıları ällä ni zur uñışqa ireşä almadı, digän fiker yañğıradı ministr çığışında. Xisapqa qarağanda ütkän 2004 yılda Aznakayda häm Saba rayonında boz sarayları, Älmät häm Quqmarada qaplanğan basseyn, Yuğarı Oslan rayonıda gol’f qırı, Qazanda 5 futbol qırı häm «Rubin» sport klubınıñ binası açılğan. Yäşlärne tärbiäläwçe sport trenerlar1ına tüläwne arttıru öçen, ministrlıq ciñel yul uylap tapkan. Däwlät qaramağında bulğan sport belän şöğellänü üzäklärendä tüläwle xezmätlär küpläp kürsätelgän. 2005 yılda da bu eş däwam iteläçäk.

Bikä Timerova.

XS
SM
MD
LG