Bu aralarda respublikada citäkçe kadrlarnı almaştıru bara. Soñğı könnärdä genä respublikada 4 rayon başlığı alışındı. İnde xäbär itkänebezçä, uzğan comğadan Bawlı rayonın Al’bert Xäbibullin citäkli başladı. 19 fevral’dä Qazannıñ Aviatözeleş häm Sovet rayonınıñ yaña xakimiät başlıqları bilgelände. Xäzer älege rayonnarnı Andrey Belov häm Foat İbätullin citäkliäçäk. 24 fevral’ könne respublikanıñ Quqmara rayonına da yaña xakimiät başlığı täqdim itelde. Xäzer rayon belän Quqmaranıñ söt kombinatın citäklägän Rawil Räxmätullin idärä itäçäk, dip xäbär itä Tatar-inform agentlığı. Elek bu wazifanı başqarğan Nail Şakirov ta başqa iske glavalar kebek ük respublikanıñ ber ministrlığına ministr urınbasarı itep urnaştı. Yaña citäkçese täqdim itärgä isä Quqmara rayonına Tatarstannıñ premyer-ministrı Röstäm Miñnexanov kilde. Monda ul, şulay uq, rayonnıñ tormışı belän dä tanıştı, 14 tözelgän sport sarayı açışında qatnaştı. Xäzer quqmaralılar üzläreneñ sport ölkäsendäge näticälären tağın da üsterä alaçaqlar.
Älege citäkçelär niçek eşlär häm nindi näticälär kürsäter, älegä bilgesez. Ä menä respublikanıñ awıl xucalığı oyışmaları soñğı aralarda it citeşterüne arttırğannar. Xäyer, şul xisapqadır küräseñ, Tatarstanda törleklär sanı kimegän. Şulay uq respublikada äyberlärneñ satunıñ küläme dä artqan. Uzğan yılnıñ şuşı uq ayları belän çağıştırğanda, tatarstanlılar azıq-tölek bulmağan tovarlarnı 20 protsentqa kübräk satıp alğannar. Monıñ öçen alar 10537 million sum aqça sarıf itkännär. Xalıqnıñ tağın ber zur ğına çığım matdäse – toraq-kommunal’ xezmät öçen tüläwlär. Çönki torğan sayın älege tarmaqtağı reforma tüläwlärneñ külämen arttıra bara. Şuşı reforma häm, ğomumän, respublikada toraq-kommunal’ xezmäteneñ torışı turında 24 fevral’ könne Tatarstannıñ tözeleş, arxitektura häm toraq-kommunal’ xucalığı ministrlığınıñ kollegiäsendä bardı. Anıñ eşendä Mintimer Şäymiev tä qatnaştı. Älege ministrlıqnıñ ministr yärdämçese Ramil Sabircanov süzlärenä qarağanda, 2004 yılğa näticälär yasawdan tış, kollegiä utırışında respublikada tözeleş tarmağındağı eşçänlek tikşerelgän. Şulay uq, soñğı aralarda ayıruça aktual’ bulğan monetizatsiä - taşlamalarnı aqçalata tüläwlärgä alıştıru reforması turında da süz bardı. Kiçkä qädär däwam itkän kollegiä utırışında älege reforma qısalarında respublikada toraq-kommunal’ tüläwläre turında da bik qızu fikerläşülär buldı. Alarnıñ näticälären yaqın arada inde härkem üzeneñ aqça yançığında sizäçäk. Şul uq könne respublikanıñ Säwdä ministrlığında da uzğan yılğa näticälär yasap, 2005 yıldağı eşçänlek turında söyläştelär.
Gölnaz İlgizär
