Accessibility links

Кайнар хәбәр

Yaña toraq kodeksı kem mänfäğäten qayğırta?


Yaña toraq kodeksınıñ ğämälgä kerüe fatir xucaların ğına tügel, keçe biznes wäkilläreneñ iğtibarın da cälep itärgä tieş. 2nçe mart könne «Tatmedia» agentlığında şuşı temağa bağışlanğan matbuğat oçraşuı ütte. Toraq kodeksınıñ qabul itelüe belän eşmäkärlärgä toraq-komunnal ölkägä kerep, bazar şartlarında xezmät kürsätergä mömkinlek tua. Ä ğadi keşelär, iñ yaxşı eçläwçe kompaniä arasında saylı alaçaq ikän.

Xosusıylaştırılğan fatirlarnıñ xucaları, üz fatirlarnı tärtiptä totu öçen cawaplılıqnı üz östenä ala. Däwlät qaramağında bulırğamı, ällä xucağa äylänergäme digän mäs’älä östendä uylanırğa äle 2 yıl waqıt bar. Şunnan soñ tüläwsez xosusıylaştıru beterelä. Elek, xosusıylaştıru yasağan keşelär, yortnıñ remontı öçen aqça birüne tuqtatıp, aylıq tüläwlärne berazğa kimetü yulın qarağan ide. Xäzer xosusıylaştırunıñ başqa faydalı häm faydasız yaqları da kürenäçäk. Yaña toraq kodeksı nigezendä, 2006 yılğa qädär, fatir xucaları toraq belän idärä itü ısulın saylarğa tieş bula. Remont, torbalarnıñ tözeklege, çüp tügü, kebek eşlärne alar üzläre qarap toramı, fatir xucaları iptäşlege yäki idärä itü kompaniäsenä tapşıramı, şunı xäl itärgä tieş bula. Däwlät bu ölkädän bötenläygä kitäçäk, dip äytelsä dä, şul uq idärä itü kompaniäse dä däwlätneke bula ala. Eşmäkärlekne üsterü agentlığı matbuğat oçraşuın ütkärep, keçe biznes wäkillären bu eşkä nıqlap kereşergä çaqırdı. Kommunal xezmät kürsätü şäxsi qullarğa küçsä, torba alıştıru, elektr çıbığın qaraw kebek eşlär ber totqarlawsız häm sıyfatlı başqarılaçaq, dip sanala. Anıñ öçen bazarda köndäşlek şartlarınıñ buluı kiräk. Toraq reformasına bäyle yañadan yaña qanunnar çığıp tora, yaña toraq kodeks şartlarında eşli belüçe keşelär az. Şuña kürä, eşmäkärlekne üsterü agentlığı keçe biznes wäkillärenä 2 aylıq uqular oyıştırırğa uylıy. Älegä, agentlıq, 30 belgeçne äzerläp çığarırğa uylıy. Ä toraq kommunal xucalıq häm tözeleş ministrlığı ütkän yılda 120 keşe uqıtıp çığarğan. 2005 yılda tağın 200ne äzerlärgä uylıy. İdärä itü kompaniälären böten respublika buylap cäyelderü kötelä. Xäzerge waqıtta andıy 49 oyışma eşläp tora. Alarnıñ 4-5 genä şäxsi qullarda, qalğannarı däwlätneke. Şulay itep, Çallı, Älmät häm Apasta şäxsi şirkätlär fatir xucaları öçen kommunal xezmätkärne kürsätä. Ministrlıq wäkile äytkänçä, köndäşlek şartlarında eşlägändä, xätta fatir xaqların da töşerü mömkinlege bulaçaq. Bu üzgäreşlär toraq kommunal ölkägä aldağı 2-3 yıl eçendä genä keräçäk. Ä xäzer uq tülänä torğan açqalar qayada kitä, kem alarnı qullana, bu sorawğa cawap birüçelär yuq.

Bikä Timerova.

XS
SM
MD
LG