Accessibility links

Tatar nindi kitap uqıy


3 mart könne Tatarstannıñ Milli Kitapxanäseneñ Yazuçılar berlege belän uzdırıla torğan “Yıl kitabı” bäygeseneñ näticäläre bilgele buldı. Bıyılğı konkurs 2003 yılda basılğan häm uzğan yılda respublikabıznıñ kitapxanälärennän alıp uqılğan kitaplar arasında ütkärelde.

Anıñ maqsatı – tatar yazuçılarınıñ äsärlären Tatarstanda yäşäwçe törle millät keşeläre arasında propagandalaw, uquçılarnıñ zäwığın belü, yıl däwamında iñ küp uqılğan kitaplarnı bilgeläw.

Konkursta 2003 yılda respublikabız näşriätlärendä basılğan 138 kitap qatnaştı.

Yıl däwamında iñ küp uqılğan kitapnı bilgeläwdä Tatarstannıñ 1630 kitapxanäsennän näticälär alınğan.

Dimäk, tatar xalqınıñ nindi äsärlär uquın häm bügenge köndä nindi yazuçılar belän qızıqsınuların bilgelärgä dä nigez bar.

Näticälärne yasawda Tatarstan Yazuçılar berlege, yazuçılarnıñ PEN üzäge, Milli kitapxanä häm näşriätlär citäkçeläre qatnaştı.

Bäygedä proza, poeziä, balalar ädäbiäte häm rus telendä çıqqan matur ädäbiät nominatsıäläre buyınça ciñüçelär bilgelände. Ciñüçelärne dä äytep kitik.

Çäçmä äsärlär arasınnan:

1 urınnı Näbirä Ğıymatdinovanıñ “Parlı yalğız”,

2 urınnı Ğalimcan Ğıylmanovnıñ “Albastılar”,

3 urınnı Rädif Säğdineñ “Qanğa buyalğan altınnar” kitapları yawladılar.

Şiğ riät buyınça:

1 urınnı Möxämmät Mirzanıñ “Kiek qaz yulında”,

2 urınnı Änäs Xäsänovnıñ “Cırım – al cilkän”,

3 urınnı Zinnur Mansurovnıñ “Cäräxätle yöräk cılıraq” isemle şığır cıyıntıqları aldılar.

Balalar ädäbiäte ölkäsendä:

1 urınğa İldar Yuzievnıñ “Bäbi Ay”

2 urınğa Möcähitneñ “Aqıllığa süz äyttem...”

3 urınğa Läbibä İxsanovanıñ “Şomırt çäçäkläre aq qına” kitapları layıq buldılar.

Rus telendä çıqqan matur ädäbiät arasınnan:

1 urınğa “Фирүзә:Сказки татарских писателей”

2 urınğa Maya Wälieva “Люди и бюльтерьеры” kitapları çıqtı.

Monnan tış yazuçılarnıñ PEN üzäge “Süz irege häm irekle süz” nominatsiäsendä ber avtornı büläklärgä tieş, läkin kem layıqlı buluı älegä ser bulıp qala.

Şulay uq, Nur Äxmädievneñ “Saylanma äsärläre”neñ 4 tomı, Räşit Bäşärneñ “Qoyaşlı yañğır” kitapları da küp uqılğan dip bilgelände, alarğa da istälekle büläklär häm qızıqsındıru diplomı bireläçäk.

Näticälär bügenge köndä inde bilgele bulsa da, ciñüçelärgä büläklär tapşıru tantanası may ayında, Milli kitapxanägä 140 yıl tulu uñayınnan ütkäreläçäk bäyrämnär waqıtında uzaçaq.

Köçle informatsion texnologiälär üskän çorda da “Yıl kitabı” kebek matur bäyge ütkärelä ikän, kitaplarnı uqıylar, tatarlar bernindi kirtälärgä qaramıyça, millät bularaq yäşäwlären däwam itä digän ömet bar.

Aydar Camali

XS
SM
MD
LG