Tatarstanda 1.8 million keşe eşlärlek yäştä sanala. Läkin şul uq waqıtta, soñğı yıllarda bu san 1.2 millionğa qalğan. Bu xaqta Respublika statistika idäräse xäbär itä. Şul uñaydan berniçä yöz meñ keşe sorı bazarda eşli häm salımnar tülämi digän süz bu.dip belderde Tatarstan prezidentı Mintimer Şäymiev. Bu mä’säläne xäl itär öçen Respublikada , sorı bazar, yäğni yäşeren eş belän şöğellänüne beterü buyınça eşli torğan maxsus komissiä tözelde. Prezident, mondıy xäl ber tatarstanğa ğına xas äyber tügel, ä ilneñ başqa töbäklärendä dä şundıy uq wäzğıät dide. Maxsus tözelgän komissiä sorı bazarda eşläwçelär kiläçäkläre turında uylamıylar, çönki, waqıtında tülänmägän salımnar byudjetqa ğına zıyan kitermi, ä kiläçäktä pensiä alır öçen dä zur qomaçawlıqlar tudıra dide.
10 mart könne Tatarstan däwlät sovetı belän berlektä İdel buyı federal' okrugı parlamentları citäkçeläre assotsiatsiäse utırışı uzaçaq. Anıñ eşendä federal' okrugnıñ citäkçese Sergey Kireenko da qatnaşaçaq. 2002 yılda tözelgän bu berläşmä parlamentlarnıñ täcribälären urtaqlaşunı maqsat itep quya. Assotsiatsiäneñ ütkän utırışı Putin başlağan reformalar turında ide.
Qazanda bu könnärdä Törkiäneñ TRT dip atalğan tele-radiokompaniäse jurnalistları maxsus tapşıru töşerep yöri. Ul tapşıru tatar xalqı häm Tatarstan turında bulaçaq. Alar Tatarstan prezidentı belän, akademik İndus Tahirov, prezidentnıñ säyäsät buyınça kiñäşçese Rafael Xäkimov belän oçraşaçaq. Monnan tış tatar awılındağı milli tuynı da töşerep, Törkiä qarawçılarına kürsätergä telilär.
Qazannıñ meñyıllığına berniçä ay ğına qalıp barğanda, inde räsmi çaralarnıñ niçek bulaçağı xaqında da mäğlümatlar ireşä başladı. Bäyräm tantanalarında bik küp xalıq qatnaşırğa telägänlektän, çaralar iyün ayında uq başlanaçaq. Bäyrämgä küpme qunaq kiläse älegä tögäl bilgele tügel. Şulay da, çaqırılaçaq qunaqlar öçen kvotalar kerteläçäk. Şähärneñ yubileen yaqtırtırğa kilgän jurnalistlar ğına da meñnän artaçaq. İnde qayber üzäk kanallar, tantanalar barışın töşerer öçen Qazanda üzlärenä urınnar ezli dä başlağannar.
Qol Şärif mäçeten açu tantanasına, yäğni 24 avgustqa ğäräp illäre başlıqları çaqırılğan. 26-27 avgust könnärendä uzaçaq BDB illäre xalıqara sammitına il başlıqlarınnan tış, alarnı ozata baruçı 100 är keşe dä bulaçaq. Monnan tış, avgust axırında rusiä töbäklärendäge parlamentlar citäkçeläre qatnaşında Rusiä däwlät şurası utırışı da uzdıru planlaştırıla. Qunaqlar älegä qädär bulğan häm tözelep kilüçe qunaqxanälärdä, ber işe isä uñaylı teploxodlarda da yäşäyäçäk. Älege mäğlümatlarnı Tatar-inform mäğlümat agentlığınnan alındı.
Räfis Cämdixan
