Accessibility links

Кайнар хәбәр

Qazannıñ 1000 yıllığına bağışlap


Qazannıñ 1000 yıllığına Mäskäw inde uzğan yıldan uq äzerlänä başlağan ide. Täbrikläw 14nçe martta “Rossiä” konsert zalında ütärgä tieş. Bu qotlaw konsertın oyıştıruçılar Mäskäwneñ milli mädäni moxtäriäte häm Mäskäw xökümäte. Ä inde bu proyektnı alarğa mäskäwle xanım Nelüfer Yakupova täqdim itkän. 14nçe martqa inde ozaq qalmıy. Xäzer Mäskäwneñ üzäk uramnarındağı zur reklama taqtalarında da iğlannar barlıqqa kilde. Konsert programmasınıñ iseme “Mäxäbbät küpere” dip atala. Äle äzerlekne başlap cibärgän waqıtta uq programmanıñ rejisserı Vladimir Pasıynkov bu tamaşağa “Mäskäw yılğası İdelgä qoya” digän isem täqdim itkän bulğan. Läkin ul isemne xuş kürmiçä oyıştıruçılar programmanı “Mäxäbbät küpere” dip atawnı şart itep quyğannar. Bu xaqta ni öçen täfsilläp söylim, inde xäzer tamaşağa berniçä kön qalğaç, barlıq uramnarda iğlannar barlıqqa kilgäç, Mäskäw xökümätennän “Ul nindi mäxäbbät küpere, duslıq küperenä üzgärtegez!” digän färman kilgän. Şulay itep, Mäskäw Qazanğa mäxäbbäten tügel duslığın añlatırğa tırışqan küräseñ. Läkin kem äytmeşli, inde poyezd kitkän. Biletlar satılıp betkän, iğlannar uram tulı. İsemne üzgärtergä soñ bulıp çıqqan. Biletlar digännän. Rossiä konsert zalına ike meñ altı yöz tamaşaçı sıya. Biletlar da 150 sumnan 2000 meñgä qädärle ide. Barısı da satılıp bette, dide oyıştıruçılar. Konsert programmasınıñ üzenä kilgändä, ul tatar süze tatar cırları digän qağidäne totmağan. Biredä inde rus telle, läkin tatar millätennän bulğan bik tanılğan artistlar çığış yasar dip kötelä. Çönki oyıştıruçılar konsertta qatnaşuların sorap küp sanlı bilgele millättäşlärebezgä xatlar yullağan. Mäsälän, kompozitor Sofiä Ğöbäydullina üze kilä almasa da, muzıykasın cibärgän, anıñ muzıykasına baletmeystr Liliä Sabitova biü quyğan. Şulay uq konsertta Fuat Mansurov citäkçelegendä Bolşoy teatr orkestrı da, anda eşläwçe tatar millätennän bulğan biüçelär dä cırçılar da çığışı yasayaçaq dip kötelä. Häm menä Alsu belän Zemfira bu konsertta qatnaşa almayaçaqlar. Läkin Çulpan Xammatova, Sergey Şakurov, Arkadi Nasıyrov, Renat İbragimov, Nailä Fatexova häm Roza Xabibullina kebek tanılğan cırçılarıbız häm artistlar qatnaşaçaq bu konsertta. Tatar cırları cırlamasalar da tatar artistları eşlägän, “Dyuna”, Premcer ministr”, “Na-na” törkemnäre dä qatnaşır dip kötelä.

Oyıştıru komitetı räise Änwär Xösäyenov, Tatarstannan zur «desant» kötäbez. Artistlar bulmasa da, xökümättän zur wäkillek kiler dip kötelä dip, xäbär itte.

Şulay itep, 14nçe martta , düşämbe könne Mäskäw sänğat köçläre Tatarstannıñ başqalası Qazannı meñ yıllığı belän qotlayaçaq. Häm anda tatar telendä kümäk cır bulıp Röstäm Nevretdinov muzıykasına yazılğan cır da yañğıraçaq. Anda şundıy yullar bar.

Qazannardan Mäskäw kürenä mikän,

Şundıy cır bar xalıq telendä

Bulsa Nurlı Qazan

Küñel türlärendä

Mäskäwdän dä Qazan kürenä.

Al tañnarda qaytıp ix ber işetergä

Qol Şärifneñ moñlı azanın

Mäskäwlär dä bügen

Siña başın iä.

Tuğan köneñ belän Qazanım!

Näzifä Kärimova, Azatlıq radiosı, Mäskäw.

XS
SM
MD
LG