Yazuçı Marat Käbirovnıñ icatı belän tanışmı sez? İnternet çeltäre andıy mömkinlek birä. www.maratkabirov.narod.ru adresında älege tatar qäläm iäseneñ şäxsi internet säxifäse açılıp eşli başladı. Avtor şiğriättä dä, prozada da icat itä. Saytta, Marat Käbirovnıñ xikäyälären küçep alırğa mömkinlek birelä, anıñ törle gäzitlärgä birgän intervyuları belän tanışırğa bula. Yazuçı turındağı biografik beleşmädä, Marat Käbirov Başqorstanda, İleş rayonı, Söñrän awılında tuğan, dip yazılğan. Ämma ul üze, bu döres tä, döres tä tügel, dip äytä. Şul awılda ul üskän, ämma Qazanda tuğan ikän. Ul üzen Aqtanış rayonı Çuraqay awılı belän dä bäyli. Xäzer ul Ufada yäşi.
Marat Käbirov lirik şiğerlär, povest’lar belän bergä. Mäzäklär, köldergeçlär belän tanılğan. Yañalıqlar bülegendä, Marat Käbirovnıñ äsärlärennän torğan «Bezneñ ildä sex yuq», digän audio-cıyıntıq çıqtı, dip xäbär itelä. Säxifädä ber genä urıs süze dä yuq, barlıq tekstlar tatarça birelgän. Axırda, Elemtä ministrlığı saytında basılıp çıqqan räsmi ber käğäzgä küz salıq. Elemtä tarmağınıñ 2004 yıl näticäläre häm 2005 yılğa quyılğan maqsatlar turındağı qararda mondıy yullar bar:
2005 yılda, Elemtä ministrlığı, 1000 yıl bäyrämenä qädär Qazannıñ telefon çeltären zamançaraqqa üzgärtergä, poçta büleklärendä, internetqa totaşu urınnarın 220 qä qädär citkerergä, 100% mäktäpne internetqa totaştırıp beterü, Microsoft häm Linux programmaların tatarçalaştıru östendä eşne däwam itärgä, Qazanda WİFİ häm WİMix kebek çıbıqsız texnologiälär qullana torğan maxsus sınaw urınnarın buldırırğa digän maqsatlarnı quya. Qazannıñ 1000 yıl bäyrämenä küp waqıt qalmadı, şuña kürä zamança texnologiälär tormışıbızğa çınnan da ütep kererme yuqmı, yaqın könnärdä kürerbez.
Bikä Timerova.
