Accessibility links

Кайнар хәбәр

Mart ayında Tatarstannıñ yaña prezidentı bulaçaq


Comğa irtäsendä Qazan Kremlendä bik xikmätle press-konferensiä buldı. Prezident Mintimer Şäymievnıñ süzçese Tatarstannıñ iñ zur gäzit häm teleradiokompaniä citäkçeläre häm qayber Mäskäw mäğlümat çaraları wäkilläre, bäysezlärdän Zvezda Povolj'ya häm Azatlıq radiosı xäbärçelären Prezident sarayınıñ Söyembikä manarası yanındağı borınğı binasına çaqırdılar. Näq säğät 10.30 jurnalistlar yanına citdi häm borçulı qiäfätle Mintimer Şäymiev çıqtı. Ayrat Zaripov aldan uq jurnalistlarnı soraw birgändä barı tik bügenge tema belän genä çiklänergä, başqa waq-töyaklärgä iğtibarnı yünältmäskä sorağan ide. Ä töp tema – Mintimer Şäymievnıñ 9 martta, çärşämbe könne Vladimir Putin belän oçraşuı. Bu oçraşuda süzneñ ni turıda barğanın şul uq könne dönyağa jurnalistlar söylägän ide. Qazannıñ 1000 yıllığı, metro tözü häm 5 stansiäne avgust ayında açu kebek närsälär turıda serläşkännär Putin belän Şäymiev. Comğa irtäsendä bilgele buluınça, süz anıñ belän genä çiklänmägän ikän. Vladimir Putin Mintimer Şäymievqa şundıy täqdim häm üteneç belän möräcäğät itkän. Yañadan tağın ber möddätkä Tatarstan Prezidentı bulıp eşlärgä kiräklegen äytkän.

Çınnan da, berniçä yıl elek “İrekle Yevropa/Azatlıq” radiosı xäbärçeläre belän oçraşqan waqıtta Mintimer Şäymiev ber qızıqlı belderü yasağan ide. “Min Tatarstannıñ 70 yäşlek prezidentı buluın telämim”, digän ide ul. Bu cömlä törle mäğlümat çaralarında qabatlanıp dönyanı urap çıqtı. Mintimer Şäymiev çınnan da yalğa kitärgä cıyınğan ide. Bu yulı kilep tuğan qatlawlı xälne isäpkä alıp, Şäymiev şul uq 9 mart könne Vladimir Putinğa möräcäğät yazğan häm anıñ sorawın isäpkä alıp, yaña srokka rizalıq birgän. Bu qararnıñ komanda häm Tatarstan citäkçelege strukturaları öçen şatlıqlı ikänlege berkemgä dä ser tügel. Çönki bik küplär xakimiät alışınu waqıtında baş awırttırıp intekmiäçäk. Mintimer Şäymiev respublika prezidentların saylap quyu yağında buluın yäşermi häm qayçan da bulsa prezidentlarnı turıdan-turı saylaw tärtibeneñ yañadan qaytuına ömetlänä.

Mintimer Şäymiev, “ägär dä turıdan-turı saylaw xäzer ük bulğan bulsa, min barıber dürtençe srokka çıqmağan bulır idem”, disä dä, ul üzeneñ saylanuına kirtälär kürmi. Kiresençä, saylanmawınıñ anıñ öçen problema buluın äytte.

“Watanım Tatarstan” gazetasınıñ baş möxärrire Miñnazim Säfärovnıñ, yañadan prezidentlıqqa raslanu Tatarstan-Rusiä kileşüenä zıyan yasamasmı, yañaça quyılğan prezidentnıñ xoquqları häm statusı kimemäsme, digän sorawlarnı Prezident bik möhim häm qızıqlı dip bäyäläde. Cawabında isä, yaña şartnamä qanun räweşendä tözeläçäk, anıñ inde 60 protsent eçtälege kileşengän. Bu dokument Putin häm Şäymiev tarafınnan raslanıp, Däwlät Duması häm Federatsiä Sovetı aşa da ütkäreläçäk, dide.

Bu oçraşuda Mintimer Şäymiev cirle üzidarägä saylawlar, monetizatsiä, Qazannıñ 1000-yıllığına äzerlänü kebek aktual' mäs'älälär turında qızıqlı mäğlümatlar da birde. Koryak okrugı häm Yıraq Şärıqtağı qayber töbäklärdäge xucasızlıq, öylärneñ salqın buluı şaqqatıra torğan xäl. Mintimer Şäymiev ul yaqlarda öy cihazların sütep yağa başlawğa bik ğäcäplänä. Ul ber tatar taqmağın iskä töşerep, anı bik qızıqlı itep rusçağa tärcemäläp kürsätte.

Menä şulay säyäsät, zur mäs'älälär, çeterekle xällär, buldıqsızlıq turıda barğan matbuğat oçraşuı qızıqlı tämamlandı. Jurnalistlar häm yaña xäbärne işetkän çinovniklar şatlıqların yäşermiçä, tizräk xezmättäşlär yanına aşıqtı. Tatarstan prezidentı saylanuına häm bilgeläwenä äzerlänep bik küp köç häm aqça tükkän säyäsmännär yaña wazğiät turında baş wata. Çönki prezident täxete öçen köräş qabınmıyça ğına sünärgä tora. Tatarstannıñ yaña prezidentı iseme xäzer ük bilgele – ul Mintimer Şäymiev. Mart ayında prezidentnı Däwlät Sovetında raslaw protsedurası tämamlanaçaq, annarı xökümät strukturaların yañadan bilgeläw buyınça reglamentta qaralğan çaralar ütäçäk.

Rimzil Wäli

XS
SM
MD
LG