Accessibility links

Кайнар хәбәр

Omskinıñ “Umırzaya” sänğatkärläre Muromsevo kitapxanäsenä kitaplar tapşırdı


Citäkçese millättäşebez Tamir Alimbayıv bulğan “Yenisey” berläşmäse Omskida 6 yıldan artıq eşläp kilä. Korporasiä asılda awıl xucalığı cihazların satu belän şöğellänä. Anıñ filialları, kibetlär çeltäre, wäkillekläre ölkäneñ awıl-rayonnarında ğına tügel, kürşe-tirä töbäklärdä dä şaqtıy taralğan. Uzğan comğa könne ölkäneñ Muromsevo rayon üzägendä älege korporatsiäneñ tağın ber-16-nçı filialı açıldı. Anıñ açu seremoniäsendä korporatsiä citäkçelege, rayon xaqimiäte wäkilläre, awıllardağı aqsionerlıq xucalıqlar başlıqları, fermerlar häm başqalar buldı. Muromsevo filialın açu üzenä kürä ber üzençälek belän ütte-qorporatsiäneñ generäl direktorı Tamir Alimbayıv anda “Umırzaya” tatar-başqort ansambelen çığış yasarğa çaqırdı. Ansambl'neñ cırçıları tatar häm rus tellärendä cırlar başqardılar. Bu açu seremoniäsenä bäyräm töse kertte disäk tä yalğış bulmas. Seremoniä barışında çığış yasawçılar, “Yenisey” berläşmäsenä räxmät äytüçelär küp buldı. Taşlandıq xäldä bulğan yortnıñ xäzer rayon üzägen bizäp toruçı binağa äwerelüen bilgelädälär. “Umırzaya” kollektivı ber uñaydan rayonnıñ Mixäil Ul'yänov isemendäge üzäk kitapxanäsendä buldı. Kollektiv anda kitapxanä mödire Zoya Vlasenko belän oçraştı. Äytergä kiräk, ğinwar ayında Muromsevo yağında konsert belän bulğan waqıtta “Umırzaya” kollektivı kitapxanä belän tanışıp çıqqan ide. Ul waqıtta Vlasenko xanım “Qızğanıçqa qarşı, bezdä tatar kitapları yuq. Kitaplar bulğan oçraqta, tatar ädäbiätı poçmağı oyıştırır idek”, - dip beldergän ide. Şunnan soñ “Umırzaya” ansamble äğzaläre kitaplar cıya başladılar. Xäzerge oçraşuda “Umırzaya” kollektivı üzläre cıyğan häm Bötendönya tatar Kongressınıñ başqarma qomitetı büläk itkän, cämğısı 50 danä kitapnı, Muromsevo rayon kitapxanäsenä tapşırdı.

Rozaliä Sayğanowa, Omski
XS
SM
MD
LG