Accessibility links

Кайнар хәбәр

19 martta Tatar ictimaği üzägendä millät yazmışına bağışlanğan cıyılış uzaçaq


Respublikadağı milli tormış turında tağın ber xäbär. 19 martta mari xalqınıñ tanılğan şağire Rai Mardannıñ kitabın täqdir itü bulaçaq. Çarada Mari El respublikasınnan kilgän sänğät ostaları qatnaşır dip kötelä. Täqdir itü kiçäsennän soñ ütäçäk cır, biü kiçäsendä isä Qazanda yäşäwçe marilarnıñ milli-mädäni moxtariäte wäkilläre häm Yoşkar-Ola, Mari El respublikasınıñ İdel rayonınnan kilgän qunaqlar da bulaçaq.

Tatarstan ärmännäre, mariları menä şundıy zur eşlär eşläp yörgän arada, tatar milli xäräkäte wäkilläre dä tik utırmıy. Beräwlär qorıltay dip cıyılışlar ütkärä, ikençelär Tatar ictimaği üzäge wäkilläreneñ qorıltayın ütkärergä äzerlänä, berläşä yäki, kiresençä, taralışa. Azatlıq radiosına comğa könne tağın ber belderü kilep ireşte. Anda menä närsä dip yazılğan. 12 martta Qazanda, Bötentatar ictimaği üzäge yanında Zäki Zäynullin häm Yunıs Kamaletdinov citäkçelegendä oyışqan häm üzen BTİÜneñ Qazan bülege yäki oyıştıru komitetı dip atawçı törkem üzeneñ cıyılışın uzdırdı häm anı Bötentatar ictimaği üzägeneñ VIII qorıltayı dip iğlan itte. Çınında isä, bu törkem älege çaranı, Bötentatar ictimaği üzägeneñ citäkçelegen inqär itkän xäldä, oyışmanıñ ustavına qarşı kilep, üzbeldeklege belän genä ütkärde. Şunıñ öçen Bötentatar ictimaği üzägeneñ prezidiumı bu törkemneñ ğämällären milli xäräkättä butalçıq tudıru dip qabul itä häm bu qorıltay dip atalğan cıyınnı legitim dip sanamıy. BTİÜ prezidiumı üzeneñ barlıq büleklären häm aktivistların 2 aprel’dä Qazan milli-mädäni üzägendä uzaçaq Bötentatar ictimaği üzägeneñ VIII qorıltayında aktiv qatnaşırğa çaqıra, dip äytelä Räşit Yağfarov imzalağan belderüdä.

19 mart könne isä Tatar ictimaği üzägeneñ utırışlar zalında Milli Şura dip isemlängän Tatar cämäğät oyışmaları bergälege Millätne häm Tatarstan möstäqillegen niçek saqlap qalırğa? digän temağa söyläşü uzaçaq. Anda ğalimnär, säyäsätçelär, jurnalistlar, milli oyışmalar wäkilläre qatnaşır dip kötelä. Çara şimbädä, köndezge säğät 11dä başlanaçaq.

Gölnaz İlgizär

XS
SM
MD
LG