Accessibility links

Кайнар хәбәр

Ufada «Salawat» teatrı ğastrolläre başlandı


Comğa könne Ufada kürenekle cırçı, Tatarstannıñ xalıq artistı Salawat Fätxetdinovnıñ ğastrol'läre başlandı. Bu yulı Salawat Fätxetdinov üzeneñ tuğan yağına alıp qaytqan yaña proğrammasın bik ğädi genä atağan. «16 nçı sezon. Haman da bergä» dip isemlängän tamaşa tanılğan cırçınıñ näq menä unaltınçı şäxsi proğramması, unaltınçı yıl üzallı çığış yasawın añlata.

Ufağa kilep citü belän, atnaqiç könne Salawat Fätxetdinov jurnalistlar öçen zur matbuğat oçraşuı oyıştırdı. «Kiçke Ufa» gäzite redaqsiäsendäge aralaşuğa respubliktağı bixisäp mäğlümat çaraları ähelläre kilgän ide. Salawat Fätxetdinov söyläşüne açıp, jurnalistlarğa teläsä nindi temğa sorawlarnı irkenläp birergä röxsät itep, oçraşuğa şunda uq küptänge tanışlıq ruxın kertep cibärde. Sorawlar çınlap ta törle-törle ide. Tanılğan cırçınıñ icatına qağılışlı sorawlar belän bergä anıñ sport ölkäsendäge uy-niätläre xaqındağı sorawlar da, spirtlı eçemleklärdän närsäne yaratuına, biznesına, tuğan awılında ällä niçä qottedjalr saldıruına qağılışlıları da buldı. Üzeneñ xäyriäçelek eşçänlegenä bäyle sorawğa cawap birep, tanılğan cırçı «min monı qayberäwlär uylawınça, kemgäder oşarğa tırışıp eşlämim, ä canım telägängä eşlim», – dip äytte. Alqoğol'le eçemleklärneñ qaysısına östenlek birüe turındağı sorawğa cawap birep, Salawat äfände:«Minem sälamätlegem ul qädär yaxşı tügel, şuña kürä yaxşı sıyfatlı araqı ğına, atap äytkändä, 75 graduslı ärmän araqısı – tut araqısı ğına eçäm», – dip belderde. Ämma konsert aldınnan häm konsert könne Salawat Fätxetdinov spirtlı eçemleklär eçmi ikän. Monı ul muzıykantlarına da röxsät itmi.

Salawat Fätxetdinov Tatarstan telewideniesendä üzeneñ ayırım tapşırular seriäsen başlap cibärä ikän. Şuşı yañalıqqa bäyle sorawnı da birde jurnalistlar. «Bu tapşırular cır sänğätebez häm kürenekle cırçılarıbız xaqında bulaçaq, – di populyar cırçı. – Häm bu proğrammalarda, nigezdä, ölkän yäştäge mäşhür cırçılarğa küp urın bireläçäk»

Audio (Salawat)

Jurnalistlar belän «sin dä min» söyläşüdä Salawat Fätxetdinov hämmä sorawğa citdi dä, şayartıp ta, kinayale dä cawaplar birde. Qısqası, Salawat Fätxetdinov bu yulı da üze bulıp qaldı. Qılanıp utırmadı, ğädi häm añlayışlı cawaplar qaytardı.

«Salawat» estrada teatrınıñ Ufadağı konsertları başqalanıñ törle mädäniät saraylarında 31 martqa qädär däwam itäçäk. Annan soñ populyar sänğät törkeme Başqortstannıñ Stärletamaq, Salawat häm Dürtöyle şähärlärendä dä berär konsert biräçäk. Ä aprel azağında Başqortstanğa ikençe kilüendä Salawat Fätxetdinov respubliknıñ küpçelek xalqın başqortlar bilägän rayon häm şähärlärdä çığış yasarğa cıyınuın da xäbär itte.
XS
SM
MD
LG