Qırğızstannıñ zurlığı yağınnan ikençe şähäre bulğan Oşta oppozitsiä xalıq qorıltayı ütkärde. Qorıltay Oş ölkäse xakimiäten almaştırırğa tieşle idarä itüçe xalıq şurasın oyıştırdı. Açıq hawada ütkän bu xalıq qorıltayında meñnärçä protest belderüçe qatnaştı. Qorıltay ölkä xakimiät binası qarşında ütte. Bu binanı kiçä ük oppozitsiä basıp alğan ide. Çığış yasawçılar arasında elekke ilçe Roza Otunbayeva, elekke premyer ministr Kurmanbek Bakiev kebek oppozitson säyäsätçelär dä buldı. Demonstratsiäçelär prezident Askar Akaevnı xakimiättän kitärgä çaqırdı. Oş ölkäseneñ Xalıq Şurası räise itep oppozitsion säyäsätçe Änwär Artıkov bilgelände. Qorıltayçılar şulay uq xalıq brigadası da oyıştırdı. Bu brigada qoralsız ixtıyarıylardan torğan iminlek köçe bulaçaq. Alar demonstratsiälärne häm oppozitsiä basıp alğan binalarnı saqlaw öçen kiräk dielä. Xalıq şurası räsmi cirle xakimiätkä alternativ idarä oyışması bularaq qarala. Moñarçı Jalalabad ölkäsendä häm başqala Bişkäktä dä şundıy şuralar oyıştırılğan ide. Oppozitsiä aktivistları alar protest çaralarına yaña etärgeç birer dip ömetlänülären belderä. Protest belderüçelär küptän tügel ütkän parlament saylawlarında xakimiät faydasına xärämläşülär buldı dip prezidentnıñ xakimiättän kitüen häm yaña saylawlar ütkärüne taläp itä. İlneñ törle öleşlärendä moñarçı ütkän demonstratsiälär waqıtında berniçä cirle xakimiät binası basıp alındı, Oş belän Bişkäkne totaştıruçı yul yabıldı. Bügen dä mitinglar ilneñ berniçä şähärendä däwam itte.