Prezident Viktor Yuçenko Ukraina ğaskärlären Ğiraqtan çığaru turındağı färmanğa qul quydı. Uzğan atnada Ukraina xärbi köçläre Ğiraqtan kitä başladı inde, alarnıñ sanı 1 650 keşe, uzğan atnada öylärenä 130 xärbi qaytqan.
Saqlanu ministrlığı mäğlümatlärenä qarağanda, 550 xärbi 15nçe mayğa qadär, qalğannarı yıl azağına qadär qaytaçaq.
Ukrainanıñ milli iminlek häm saqlanu şurası başlığı Petro Poroşenko, Ukraina dikaberdä Ğiraqta saylawlar ütkärergä yardäm itäçäk, dip belderde.
"Ğaskärlärne çığarıp beterü waqıtı – üktäber, noyaber yä dikaber bulamı, anı bez koalisiädäge berektäşlär belän kiñäşläşkäç xäl iterbez. Ukrainanıñ tınıçlıq saqlaw köçlärenä Ğiraq Milli Mäcles saylawların uzdırırğa yardäm sorap möräcäğät itelde," dide Ukraina saqlanu şurası räise.
Ämma Yuçenkonıñ imzasınnan soñ ğaskärlärne çığarunı tuqtatıp bulmayaçaq.
Ğiraqta barlığı 18 ukrain xärbie hälak buldı, 20dän artıq keşe yaralandı. Ukraina başta Ğiraq suğışına qarşı çıqqan ide, ämma soñıraq Polşa xärbi citäkçelege astında xezmätkä üzäk häm könyaq Ğiraqqa üz xärbilären cibärergä qarar itte.
