Accessibility links

Toraq programması tämam, läkin problemnar açıla tora


Tatarstan başqalasında toraq mä’säläsen kütärep piketqa çığarğa niätläwneñ säbäbe ällä ni tirändä tügel. Şulay da, mä’säläne baştan uq açıqlap ütik.

Tatarstanda tuzğan toraqnı beterü programması tögällängängä inde 3 aylap waqıt uzdı. Anıñ näticäläre rusiädä tiñe bulmağan xäl dip tabılsa da, qayber añlaşılmawçılıqlar da çığa tora. Mäsälän, küptän tügel genä, Tatar-inform mäğlümat agentlığında uzğan oçraşu waqıtında, tuzğan toraqnı beterü fondı citäkçese Tälğät Abdullin, Azatlıq xäbärçese sorawına, älege köngä qädär, Qazanda 531 yort tuzğan toraq programmasına kertelmägän bulsa da, alar yaña urınnarğa küçerelgännär, bu xälne tikşerü bara dip beldergän ide. Yäğni, programma buyınça, toraq yortları iske, tuzğan dip tabılmağannar da, yortlarınnan çığarılğannar, yaña fatirlarğa tiengännär bulıp çığa. Programmanıñ nigezendä Qazandağı tuzğan toraqlarnı beterü qaralğan ide. Şuña kürä, küp kenä añlaşılmawçılıqlar Qazanda kilep çığa da. Qazannıñ üzägendäge qayber yortlarda yäşäwçelär, şähär çitendäge yaña fatirlarğa küçärgä telämilär, bezneñ yortlar iske tügel, yä yäşärlek dip baralar. Läkin, Qazan xakimiäte alarnı küçergä mäcbür itä. İske toraq xucaları, alar berniçä distä ğailä, üzläreneñ xoquqların yaqlar öçen küptän tügel, Qazan üzägendä toraqqa iä buluçılarnıñ xoquqların yaqlaw komitetı oyıştırdılar. Älege komitet äğzaları, iske toraqlarda alarnı qaldırunı, iske toraq isemlegennän töşerüne taläp itälär. Alarnıñ süzlärenä qarağanda, xäzer yäşi torğan, şähär üzägendäge yortları şaqtıy äybät, häm ul iske dip berniçek tä sanala almıy. Bu xaqta, komitetqa kerüçelär, Tatarstan prezidentına da, şähär xakimiätenä dä berniçä märtäbä möräcäğät itkännär ide. Tatarstan prezidentı, Rusiä televideniese buyınça, älege mä’säläne küzätü astına aldım dip belderde.

Läkin mäsälän monıñ belän xäl itelmäde. Komitet citäkçeläre, tuzğan toraqnı beterü buyınça programma iseme astına yäşerenep, toraq genotsidı ütkärälär dip, Qazan xakimiäten ğäyepläp çıqtı, häm 24 martta, İrek mäydanında, Däwlät Şurasınıñ çirattağı sessiäse açılğan waqıtta piket ütkärergä cıyınğannarın xäbär itkän ide. Läkin, Qazan xakimiäte piket ütkärergä röxsät birmägän. Qazan şähäre xakimiäteneñ Eçke eşlär idäräse citäkçese urınbasarı, komitet citäkçelärenä, Däwlät Şurası utırışınıñ eşçänlegenä qıyılıq tudıru mömkinlege bulu säbäple, piketnı başqa waqıtqa küçergä täqdim itkän. Şulay itep, pänceşämbedä, sessiä aldınnan, Qazan üzägendä toraqqa iä buluçılarnıñ xoquqların yaqlaw komitetı piket ütkärmäde. Anıñ urınına, mäğlümat çığanaqlarına, zur külämle xat tarattı. Anda, komitetnıñ eşçänlegennän alıp, kilep tuğan wäzğıätne xäl itü buyınça Qazan şähär xakimiäte belän alıp barılğan söyläşü-yazışular xaqında mäğlümat citkerelä. Monnan tış, Rusiä genprokurorı Ustinovka, prezident Putinğa, möräcäğät itüläre xaqında, yazılğan. Komitet äğzaları, üzläre yäşägän yortlarnı, 'rak xucaları tuzğan toraq programmasına kertelgänlegen belmi dä qalğannar dip sanıy. Qazan xakimiäte, Tatarstan xökümäteneñ tuzğan toraqqa qağılğan qayber qaraların boza, kiräkle mäğlümat toraq xucalarına birelmi dip baralar komitet äğzaları.

Räfis Cämdixan

XS
SM
MD
LG