Accessibility links

Кайнар хәбәр

Mintimer Şäymievqa almağaç büläk ittelär


Däwlät Şurası sessiäsendä deputatlar tarafınnan raslanğaç, Tatarstannıñ yaña citäkçese Mintimer Şäymievnıñ wazifağa kereşü – inauguratsiä çarası buldı. Älege çara tantanalı räweştä deputatlar, küpsanlı qunaqlar qatnaşlığında Salix Säydäşev isemendäge Zur konsertlar zalında uzdı. Tantananı Däwlät Şurası räise Färit Möxämmätşin alıp bardı. Aldan ul prezidentnıñ eşçänlege belän tanıştırdı, anıñ respublika aldındağı qazanışları turında söyläde. Annarı süz prezidentnıñ üzenä birelde. Mintimer Şäymiev Tatarstannıñ ike däwlät telendä ant süzlären äytte.

Tatarstan respublikası xalqına tuğrılıqlı xezmät itärgä, grajdannarnıñ xoquqların häm ireklären, Tatarstan respublikasınıñ däwlät suverenitetın tä’min itärgä, Tatarstannıñ Konstitutsiäsennän häm qanunnarın ütärgä, Tatarstan respublikası prezidentınıñ üzenä yöklängän yuğarı wazifaların namus belän ütärgä tantanalı töstä ant itäm

Menä şulay Rusiä häm Tatarstan gimnnarı yañğırawı astına Şäymiev üzeneñ wazifalarına tağın ber qat kereşte. Ant süzlärennän soñ, Şäymievnı qotlawlarlar başlandı. Berençe bulıp süzne Rusiä prezidentınıñ İdel buyı federal’ okrugındağı wäkile Sergey Kirienkoğa birdelär. Ul Şäymievnı qotladı häm, ğädättägeçä, bik üzençälekle büläk yasadı. Bu yulı Mintimer Şäymiev Sergey Kirienkodan büläkkä inde 5 yılğa uq almalar birä başlıy torğan almağaç aldı. Başqa çığış yasawçılar büläklär birmäde, ä barı tik prezidentnıñ respublika üseşenä kertkän öleşe xaqında söyläde, xäzerge waqıtta anı alıştırırlıq şäxes bulmawı turında äytte. Tufan Miñnullinnıñ çığışınnan ber özek.

Min sezne alıştırğısız keşe dip sanamıym. Bu sezne dä, tatar xalqın da kimsetü bulır ide. Läkin xäzer waqıtta, bügenge wazğiättä sez kiräk. Sezneñ köçle intuitsiä, zur tormış täcribägez kiräk. Annan soñ, sezdä şärıq diplomatlarına xas iñ güzäl sıyfatlar tuplanğan. Ä bügenge köndä Rusiä belän mönäsäbättä dä häm böten illär belän mönäsäbättä dä şärıq diplomatiäsennän başqa yäşäp bulmıy. Xäyerle yul sezgä!

Çığış yasawçılar arasında şulay uq Rusiä Duması deputatı Oleg Morozov, respublikanıñ ere şirkätläreneñ citäkçeläre, törle rayon wäkilläre buldı. Färit Möxämmätşin Törkiä, Äzerbäycan prezidentları, İslam konferensiäse oyışması citäkçese, törle ministrlar, Rusiäneñ qayber ölkäläre citäkçeläreneñ qotlaw telegrammaların citkerde. Tantanalı çaranıñ axırında Mintimer Şäymiev yomğaqlaw çığışın yasadı. Ul kiläçäktä dä Tatarstannıñ üseşe öçen köçen jällämiçä eşlärgä telägen belderde. Annan soñ yaña prezident häm qunaqlar öçen respublika sänğät ostaları tarafınnan oyıştırılğan konsert täqdim itelde.

Gölnaz İlgizär

XS
SM
MD
LG