Accessibility links

Кайнар хәбәр

26 mart Ufada uram cıyını bulıp ütte


Anda 20 000gä yaqın keşe qatnaştı. Cıyında ufalılardan tış respublikanıñ 12 rayonı häm 14 şähärennän dä kilgän xalıq qatnaştı. Çaradağı töp taläplär Rusiädäge sotsiäl säyäsät häm Başqortstan Prezidentına qarşı yünälderelgän ide. Cıyın Mortaza Räximovqa urınınnan kitärgä çaqırdı. Artaban çarada qatnaşuçılarnıñ ber öleşe – 3000gä yaqın keşe 7 kilometr yul ütep, Oqtyäbr prospektı buylap Aq yortqa kilde. Aq yort autobuslar belän uratıp alınğan, autobuslar aldında berniçä rät bulıp militsiä xezmätkärläre çılbırı tezelgän ide. Uram cıyınında qatnaşuçılar militsiä belän bäreleşkä kermi, uram cıyının urında ğına ütkärde. Xalıq taläbe buyınça cıyılışuçılar aldına Başqortstan Prezidentı xaqimiäte başlığı Radiy Xäbirov çıqtı. Läkin aña söylärgä irek birmädelär. Xäbirovqa Prezidentqa tapşıru öçen taläplär tapşırıldı. Anda Räximovqa otstawqağa kitü dä taläp itelgän. Räsmi bulmağan çığanaqlar cıyın bulğan könne militsiä yuğarı äzerlekkä quyıluın ireşterä. Aña qarağanda, rayonnardan bik küp militsiä xezmätkärläre kitertelgän, maxsus äzerlekle militsiä törkeme dä ğaz, su siptergeç häm başqa qorallar belän xalıqqa qarşı torırğa äzerlängän bulğan. 26nçı mart şundıy uq uram cıyını Blağoweşçen şähärendä uzdı. Anda sotsiäl säyäsätkä qarşı häm dekäbr ayında tazartu ütkärgän militsiä xezmätkärlären cawaplılıqqa tarttıru taläp itelde. 27nçe mart Ufanıñ Salawat Yulayıv mäydanınnda qarşılıq aqsiäse ütte. Kommunistlar oyıştırğan bu çara taşlamalar beterelügä qarşı yünälderelgän ide.
XS
SM
MD
LG