Accessibility links

Кайнар хәбәр

Saxarov Muzeye citäkçeläre dinne mısqıllawda ğäyeple tabılıp xökem itelde. Keşe xoquqları oyışmaları protest belderä


Mäskävnıñ Taganski rayon mäxkämäse Saxarov muzeyeneñ mödire Yuri Samodurovnı häm anıñ urınbasarı Lüdmila Vasilovskayanı dinne mısqıllauda häm etnik näfrät taratuda ğäyeple taptı. Alar "Saq bulıgız-Din" digän kürgäzmä oyıştırğannar ide. Prokuror törle möddätle törmä cazaların taläp itsä dä, xakim alarnı 100är meñ rubel aqçalata cazağa xökem itte. Samodurov Mäskäv şähär mäxkämäsenä möräçäğät itäçägen belderde. Provoslav Çirkäve qararnı xuplağanda, Xalıqara keşe xoquqların yaqlau oyışmaları fiker belderü ireklegen çikliy dip tänqit ittelär.

42 sänğätkärneñ 42 xezmäte kürsätelgän Saq bulığız-Din digän kürgäzmä uzğan yılnıñ ğinvar ayında açlğan häm 96 säğättän soñ uq yabılğan ide. Kürgäzmäne oyıştırçılar, maqsät zamança cämğiättä dinneñ role turında diskussiä başlap cibärü bulıp tora dip beldergännär ide. Läkin, axırğı çiktä ul diskussiä belän genä çiklänmäde. Kürgäzmä açılğannan soñ üzlären Vatannı Yañartu buyınça xäräkät dip atağan oyışmanıñ aktivları dinne mısqıllau dip, kürgäzmäne tar-mar itep küpkenä äsärlärgä zian kiterdelär. Protestlarğa säbäp bulğan äsärlärneñ bersendä Ğaysä Päygämbärneñ bite Koka Kola reklamı yanına urnaştırılğan häm anda bu minem qanım dip yazılğan. Kürgäzmägä höcüm itüçelär huliganlıqta ğäyeplänsälär dä, Provoslav Çirkäveneñ häm qayber Duma deputatlarınıñ tıqşınuı näticäsendä alar aqlandılar. Alar urnına kürgäzmäne oyıştıruçılar, Saxarov Muzeyınıñ direktorı Yuri Samodurov, anıñ urınbasarı Lüdmila Vasilovskaya häm sänğätkär Anna Mixalçuk xökemgä tartıldılar. Mixalçuk ğäyepsez dip tabılsa da, Samodurov belän Vasilovskaya provaslav dinenä ışanuçılarnı kimsetudä häm provaslaviägä ışanğannar nigezdä ruslar bulğannıqtan, etnik döşmanlıq çäçüdä ğäyeple tabıldılar häm här berse 100är meñ rubel ştaf tülärgä xökem itelde. Mäskäv ekiskoplığınıñ häm Russiä Provoslav Çirkäveneñ süzçese Vssevolod Çaplin xökem qararın xupladı häm bu kiläşäktä ışanuçılarnı mısqıllaudan totıp qalaçaq dip belderde. Andrey Saxarovnıñ tol xaıtın Yelena Bonner monıñ belän kileşmi. Ul radiobıza birgän ängämäsendä, xökem qararı Russiädä ireklekneñ çikängän buluın kürsätä dip belderde.

Audio

"Bu vaqiğä Russiädä vıcdan ireklegeneñ bulmauın kürsätä. Provoslav Çirkäveneñ kontrolsez ireklege bar , läkin, başqa dinnär öçen, şulay uq ateizm häm agnostisim öçen ireklek yuq."

Xökemgä tartılğannarnıñ advolatı Yuri Şmidt Russiä Provoslav Çirkäven üzeneñ politik maqsätlären ğämälgä quyarğa tırışuda ğäyepläde.

Audio

"Alar bezneñ fiker häm ışanu ireklegebezne çiklärgä , provoslaviäne dävlät dine itärgä häm Russiäne teokratiägä äyländerergä telilär."

Ämnisti İnternational xökem qararınnan elek ük, Samodurov törmä cazasına xökem itelgän xäldä, anı vocdan totqını dip iğlan itäçägen beldergän de. Human Rights Watch oyışası da xökem qararın tänqitläde , bu fiker ireklegen qabul itelmäslek däräcädä çikläv bulıp tora häm dävlät belän provoslav çirkäve arasındağı yaqın mönäsäbätlärne kürsätä dip belderde. Yuri Samodurov isä mäxkämä närsä yaraqlı sänğät närsä tügel digän mäsälägä tıqşındı häm bu icat ireklege turında borçılğan häm senzuanı kire qaqqan barlıq sänğätkärlärne borçırğa tieş dip belderde.

Audio

"Mäxkämä dävlät isemennän ber ideanı formalaştırdı. Ul bu xökem qararın çığaruı belän Könbatış añına yaqın , läkin Russiägä yat sänğät bar dip rasladı. Mäxkämä degeneratsiälängän sänğät häm normal sänğät bar digän näticägä kilde."

Samodurov häm Vasilovskaya rayon mäxkämäse qararın Mäskäv şähär Mäxkämäsenä şikayät belderäçäklären häm kiräk bulğan xäldä Strasburgtağı Keşe xoquqları buyınça Yevropa Mäxkämäsenä qädäre baraçaqların belderdelär.

Färit İdelle, Praga.
XS
SM
MD
LG