Accessibility links

Кайнар хәбәр

Berdäm däwlät imtixanın tatarça ütep bulamı?


Mart axırına da qaramastan, hawa torışı haman da qışqıça salqın häm buranlı bulsa da, yaz citüe, mäsälän, mäğärif oyışmalarında, uqu yortlarında inde sizelä. Çığarılış sıynıf uquçıları mäktäpne tämamlawğa, imtixan birergä äzerlänä. Citmäsä, bıyıl Tatarstan respublikasında da böten Rusiädä kertelä torğan EGE – Berdäm däwlät imtixannarın ütkärü buyınça eksperimentta qatnaşa. Eksperiment Rusiädä inde 2001 yıldan birle barsa da, räsmi räweştä respublika uquçıları alarnı bıyıl berençe tapqır ğına birä. Şuña da, uqu yılı axırında bulaçaq imtixannar ayıruça zur qızıqsınu uyata häm küpsanlı, yış qına xäl itelmägän sorawlar tudıra. Bıyıl Tatarstanda 4 fännän Berdäm däwlät imtixanın tapşırıp bula – rus tele, matematika, ximiä häm fizika buyınça. İmtixannarnı may axırınnan başlap yün urtalarına qädär birergä mömkin bulaçaq. Läkin aña qädär, üzeñneñ belemnärne aprel ayında da tikşerep qarap bulaçaq. Fän häm mäğärif ministrlığı bu könnärdä aldan äytelgän fännär buyınça sınaw räweşendä Berdäm däwlät imtixannarın birep qarap bulaçaq. Ministrlıq mäğlümätlärenä qarağanda, anda 40 meñnän artıq keşe qatnaşır dip kötelä.

Xäyer, älege imtixannar uquçılar häm alarnıñ ata-anaları, uqıtuçıları öçen genä östämä borçılu tügel. Alarnı oyıştıruçılar öçen dä EGE zur sınaw. Nik disäñ, bu imtixannarnı ğädättägeçä genä mäktäplärdä tapşırmıylar. Alar maxsus urınnarda oyıştırılıp, imtixan barışın tikşerep torırğa maxsus keşelär, kompyuterlar, cihazlar, balalarnıñ belemnäre terkälgän maxsus blanklarnı cıyıp, sanap, tikşer öçen maxsus äzerlängän belgeçlär dä kiräk. Respublikanıñ Fän häm Mäğärif ministrlığında imtixannarğa barısı da äzer bulırğa tieş, dip belderä. Bu maqsatlarğa respublika häm federal byudjettan aqça bülenep birelä.

Şunısın da äytergä kiräk, Tatarstanda Berdäm däwlät imtixannarınıñ üzençälekläre dä bar. Alar turında bez respublika Fän häm mäğärif ministrlığınıñ maxsus buldırılğan Berdäm däwlät imtixannarın oyıştıru bülege citäkçese İlnur Mirğälievtan soraştıq.

AUDİO

Sez Fän häm mäğärif ministrlığınıñ maxsus buldırılğan Berdäm däwlät imtixannarın oyıştıru bülege citäkçese İlnur Mirğälievnı tıñladığız. Anıñ süzlärenä qarağanda, tatar telendäge biremnär häm tekstlar inde äzer. Barı tik alarnı texnologik yaqtan tormışqa aşıru yulların – blanklar yasaw, alarnı kompyuterda uqıtu mömkinlegen buldıru kebek ğämällärne genä eşläp beteräse qalğan. Şulay itep, respublikada telägän uquçılar Berdäm däwlät imtixannarın tatar telendä tapşıra alaçaq. Xäyer, bu xaqta söyläşüne bez äle däwam itärbez, x.t.

Gölnaz İlgizär

XS
SM
MD
LG