Başqortstan Tatar cämägätçelek oyışmaları berlege wäkilläre dä Mäskäwdä 7 aprel könne oyıştırılaçaq mitingta qatnaşaçaq. Bu xaqta respublika tatar cämägätçelek oyışmaları berlegeneñ bügenge utırışında äytelde.
Mäğlüm buluınça, Ufada 26 mart könne oppozitsiä köçläreneñ räsmi xaqimiätlärgä qarşı kiñ qolaçlı uram cıyınnarı ütkän ide. Anda tatar milli oyışmaları wäkilläre dä därräw qatnaştı. Şul mitingtan soñ uzğan kiñäşmädä respublikanıñ oppozitsiä köçläre kileşterü şurasına kergän oyışmalar wäkilläre aprel başında Mäskäwgä barıp ta miting oyıştırırğa kileşkän ide. Xäzer inde ul çaranıñ köne dä täğayınlängän. İl başqalasındağı uram cıyını 7 aprel könne ütäçäk häm anda Başqortstannıñ törle partiäläre, ictimağıy häm milli xäräkätläre wäkilläre, cämğıse 250 keşe baraçaq. Bu xaqta bügenge utırışta açıq äytelde.
Mäskäwdäge miting ike urında – Lubyanka mäydanı yanında häm Kreml diwarlarınnan yıraq bulmağan cirdä ütäçäk ikän. Anda Başqortstannıñ räsmi xaqimiätlärenä qatı taläplär quyılaçaq. Blağoweşçen şähärendäge waqıyğalarda ğäiple dip sanalğan Eçke eşlär ministrı Rafael Diwayıvnı eşennän alunı taläp itü dä, Mortaza Räximovnı üz wazıyfalarınnan kitärgä çaqıru da, başqa törle küp iskärtülär dä bulaçaq, dip äytelde bügenge cıyında. Başqortstan Tatar ictimağıy üzäge räise Ayrat Ğiniätullin äytüençä, Başqortstan tatar milli oyışmaları da Mäskäwdäge mitingta üz taläplären citkeräçäk. Respublikada tatar telenä dä däwlät tele statusı birüne taläp itü – şundıy taläplärneñ berse.
Älege mitingnıñ Mäskäwdä ütkärelüe il xaqimiätläreneñ iğtibarın Başqortstandağı kimçeleklärgä yünältü maqsatında eşlänä, dip belderä oppozitsiä köçläre. Kiläçäktä Başqortstanda, ğomumän dä, uram cıyınnarın oyıştıru ğämälgä aşırmaslıq eşkä äylänergä mömkin. Monı Başqortstan prezidentı xaqimiäte başlığı Radiy Xäbirovnıñ atnaqiç könne Başqortstan telewideniesenä turı efirda birgän äñgämäsennän dä çamalap bula. Ul söyläşüdä Radiy Xäbirov Başqortstan oppozitsiäsen qatı tänqit utına tottı häm kiläçäktä Başqortstanda xaqimiätlärneñ mitinglar häm demonstratsiälär ütkärü turındağı qanunnarnı qatılatırğa cıyınuı xaqında äytte. Xäbirov äfände Rusiäneñ uram cıyınnarı ütkärü turındağı qanunnarınıñ artıq demoqratik buluına zarlanıp häm ärneşep utırdı. Anıñ süzlärençä, Başqortstan parlamentı xäzer üz yağınnan bu qanunnarnı qatılatırğa cıyına ikän.
