Bu comğada Başqortstan Tatar kongressı Başqarma komitetı üzeneñ çirattağı kiñäytelgän utırışın ütkärergä tieş ide. Anda şuşı milli oyışmanıñ yaña räisen saylaw mäsäläse tikşereläçäge kötelde. Ämma älege utırış bilgesez waqıtqa kiçekterelde.
Elegräk tä xäbär itüebezçä, Başqortstan Tatar kongressı Başqarma qomitetın moñarçı citäklägän Başqortstan däwlät pedağoğiä uniwersitetı rektorı Eduard Xämitov küptän tügel Rossiä Däwlät Dumasında buşağan urınğa «Berdäm Rossiä» firkäse isemlegennän deputat mandatı alğan ide. Şulay itep ul yuğarı uqu yortı rektorı wazıyfasınnan da, Başqortstan Tatar kongressı Başqarma qomitetı räislegennän dä kitärgä tieş.
Comğa könne Ufada ütärgä tieşle cıyında Başqortstan Tatar kongressı Başqarma qomitetı äğzaları, ozaqqa suzmıyça, E. Xämitov urınına üzläreneñ yaña citäkçesen saylaw, yä bulmasa täğayınläp quyu mäsäläsen tikşerergä niätlägän ide. Ämma, bernindi añlatmalarsız, älege utırışnıñ bilgesez waqıtqa qädär kiçekterelüe turında aşığıç xäbär tarattılar. Şul uq waqıtta Başqortstan Tatar kongressı Başqarma qomitetı äğzaları arasında törle imeş-mimeşlär dä taralırğa ölgerde. Yänäse, Başqortstannıñ yuğarı citäkçelege Kongressnıñ elekke räise Eduard Xämitov belän yäşerten söyläşü ütkärgän dä, bu utırışnı bötenläy dä uzdırmasqa kiñäş itkän. Şul uq waqıtta räsmi xaqimiätlär Tatar kongressına üzläre telämägän keşeneñ quyıluınnan qurqıp, citäkçelekkä uñaylı bulğan keşene, Başqarma komitetta äğza bulğan Roza Däminowanı täğayınläw xaqında kileşkän ikän, digän xäbärlär dä taraldı.
Älbättä, mondıy borılış Başqortstan Tatar kongressı Başqarma qomitetınıñ küpçelek äğzaların nıq aptıraşta qaldırğan. Başqortstan Tatar kongressı Başqarma komitetı räise urınbasarı, Başqortstan Tatar cämägätçelek oyışmaları berlege räise Ramil Bignov tatar cämägätçelegeneñ bu xäl belän kileşmäyäçägen kisterep äytä. «Başqortstan Tatar kongressı başında kem toraçağın başqort türäläre tügel, ä Kongressnıñ 29 keşedän torğan Başqarma komitetı häm, ğomumän, kiñ tatar cämägätçelege genä xäl itärgä tieş», – dip belderä Ramil Bignov.
