Accessibility links

Кайнар хәбәр

Räşit Wahapov festivale yuğarı bäyälände


Aldağı könnärdä Tömän şähärendä Ural töbäge respublikaları häm ölkäläre konsert oyışmalarınıñ yıl sayın oyıştırıluçı zur cıyını ütä. Şuña äzerlek mäsälälären tikşerü öçen, Başqortstan däwlät filarmoniäsendä bügen utırış bulıp ütte. Söyläşüdä uzğan atna azağında filarmoniädä kürenekle tatar cırçısı Räşit Wahapov isemendäge tatar cır festiwale konsertı yomğaqları buyınça da fiker alıştılar. Tatar häm başqort xalıqlarınıñ tanılğan sänğät ostaları qatnaşlığında uzğan ul konsertqa Qazannan da utızğa yaqın keşedän torğan wäkillek kilgän ide. Festiwäl konsertı bik zur uñış belän ütte. Bu xaqta bügen filarmoniädäge kiñäşmädä dä äyttelär. Festiwäldä Başqortstan yağınnan mäşhür cırçıbız Färidä Qudaşewanıñ häm Başqortstannıñ xalıq şağire Mostay Kärimneñ, şulay uq ike millätneñ başqa asıl zatlarınıñ qatnaşuı bu mädäni çaranıñ däräcäsen bermä-ber kütärde. Soñğı un-unbiş yılda ike tuğandaş xalıqnıñ oluğ talant iäläre berlektä ütkärgän şundıy zur bäyräm berençe tapqır oyıştırıldı. İke respublika arasında soñğı yıllarda mädäni bağlanışlarnıñ kimüe, xätta, küpmeder däräcädä ber-bereñnän çitläşü küzätelgändä, şundıy berlektäge cır-moñ bäyrämeneñ Ufada da ütüe istälekle waqıyğa, älbättä. Räşit Wahapovnı tatarlar da, başqortlar da berdäy yarattı häm xörmät itte. Andıy talantlarnı härçaq istä totarğa häm yäş buınnı da alarnıñ icatı belän tınıştırıp torırğa kiräk. Bu xaqta Başqortstanda yäşäwçe tanılğan tatar cırçısı İdris Ğäziev üz fikerläre belän urtaqlaşa. (audio) Älege üzençälekle cır-moñ bäyräme bıltır aprel ayında uq Qazanda başlanıp, annan soñ Tübän Novğorod, Yekaterinburg, Sankt-Peterburg, Semipalatinski şähärlärendä häm Finländiä başqalasında däwam itkän ide. Festiwälne yomğaqlaw konsertı 18 apreldä Qazanda ütäçäk. Anda Başqortstannan da kürenekle sänğät ostaları bara. «Tatarstan» jurnalınıñ baş möxärrire Rifat Fättaxov häm Bötenönyä Tatar kongressı Başqarma qomitetı başlanğıçı belän oyıştırılğan älege bäyräm kiläçäktä dä däwam itär, digän ışanıç belderä Başqortstannıñ sänğät ostaları häm icadi zıyalıları.

Fänis Fätxi, Ufa
XS
SM
MD
LG