Bişkäk. Qırğızstandağı waqıtlı xakimiat ildän qaçqan prezident Äskär Aqayevnıñ tizräk üz wazifasınnan kitüen teli. Parlament räise Omurbäk Tekebayev bügen, ägär dä Aqayev bu xaqta ğariza birü öçen kire ilgä qayta ikän, ul ezärleklänmäyäçäk dip belderde. Xäzerge waqıtta prezident Rusiädä, ul Qırğızstannan martnıñ 24-endä, Bişkäktäge xökümät binası oppozitsiä tarafınnan yawlap alınğaç qaçıp kitkän ide. Aqayev üzen haman da Qırğızstannıñ qanuni prezidentı dip sanıy, ämma üzenä iminlek garantiäläre birelgän oçraqta urınınnan kitärgä äzer buluın äytä. İlneñ waqıtlı premyer-ministrı häm prezident wazifaların ütäwçe Qormanbäk Baqiev isä, Aqayev älegä çittä yäşäsä xäyerleräk, anıñ prezidentlıqtan waz kiçü turındağı ğarizasın Mäskäwgä maxsus parlament wäkillege barıp alırğa tieş dip isäpli.
