Accessibility links

Кайнар хәбәр

«Tatnet yoldızları - 2005» bäygese başlandı




Bu könnärdä, www.yuldash.com/tg forumçıları iğtibarın cälep itkän, ber tema buldı. Ul da bulsa «Microsoft» şirkäte wäkilläreneñ Tatarstanğa kilüe häm lokalläşterü ütkärergä teläwe turında ide. Bu xaqta bez tapşırularıbızğa xäbär itkän idek inde. Bu atnada «Micrsoft»nıñ Rusiä häm BDB illärendäge direktorı Ol’ga Dergunova Qazanğa kilep kitte häm xökümät räise wazifaların başqaruçı Röstäm Miñnexanov belän oçraştı. Moña qädär alıp barılğan söyläşülär, xäzer xökümät häm korporatsiä arasında räsmi kileşü tözügä qädär barıp citte. Ol’ga xanım, Tatarstan belän xezmättäşlek ber niçä yünäleştä baraçaq, dip xäbär itte. Berençedän «Microsoft» belgeçläre, Qazan ğalimnäre belän berlektä tatar telen populyarlaştıru belän şöğellänäçäk. Mäsälän, İnternetta yäki CD tälinkälärdä multi-media öyrätü programmaların yasaw küz aldında totıla. Şunıñ belän bergä «Microsoft», Tatarstanda «Elektron xökümät» digän proyektnı tormışqa aşırırğa uylıy. Ä Tatarstan xökümäte, älege şirkät belän xezmättäşlek itep, mäktäp tämamlawçılarnı häm bar xalıqnı zamança texnologiälär belän qullanırğa öyrätü maqsatın quya. Älege xäbär, forumçılarnıñ

(http://www.yuldash.com/tg/index.php?id=9645&q=mes) iğtibarın cälep itte häm fiker alışuğa säbäpçe buldı. Kemder, «Elektron Xökümät» ul bik qurqınıç närsä, ägär virus kerep, sistema watılsa, Tatarstannıñ barlıq serläre dönyağa çäçeläçäk, digän qurqu belderde. İñ qızıqlı söyläşü Germaniädä yäşäwçe Alia xanım häm küräseñ Tatarstanda älege proyektnı eşläwçe keşelärneñ berse Fatix Dautov arasında bardı. Fatix äfände, «Windows tatarça bula!», dip söyeneçe belän urtaqlaşqan ide. Ämma, başqa forumçılar, ul tatar tele nindi grafikada bula soñ, kurilçamı, latinçıma, digän soraw birde aña. Fatix äfände, nindi grafikada buluı miña bilgele, ämma ul minem öçen bik möhim tügel, dip cawapladı. Çit il tatarları, kurilça bulsa, äybät bulmas, digän fiker belderdelär. Fatix äfände, borçılmağız, «Microsoft» 3 törle grafikada yasıy, dip añlatmalar birde. Ägär sez dä «Microsoft»nıñ produktların

tatarçalaştıru eşenä bitaraf tügel ikän, www.yuldash.com/tg adresında urnaşqan forumğa, yäki (http://www.microsoft.com/rus/news/issue.asp?03-11-2003-OlgaDergunova.xml) «Microsoft» saytına kerep, xat yullıy alasız. Bu waqiğanıñ däwamı niçek bulır, «Tatnetnıñ» aldağı tapşırularında xäbär itärbez.



«Tatar-inform» agentlığı «Tatnet yoldızları-2005» bäygeseneñ başlanıp kitüe turında xäbär itä. Bıyılğı bäyge «Tatmedia» agentlığı yärdäme belän ütkärelä. Yarışta, internet säxifälär yasağan härkem qatnaşa ala. Täqdim itelgän eşlärne «Qazannıñ-1000 yıllığı», «tatar dönyası», «Tatarstan respublikası», «Mäğlümat çarası», «Tatar telendäge mäğlümat çarası», «Tuğan tel», «Xobby» kebek törlärgä bülep, bäyä biräçäklär. Jyuri, säxifälärneñ bizäleşenä, qullanuçılar öçen uñaylılığın, urıs häm tatar telendäge eçtälegen, uquçılar belän elemtädä toruın, ni däräcädä yañarıp toruın tikşeräçäk. «Tatnet yoldızları-2005» bäygeseneñ räsmi internet säxifäse www.tatnet.tatar.info adresında urnaşqan.



Bikä Timerova.



XS
SM
MD
LG