Bügen, 5 aprel'dä Başqortstannıñ oppozitsiädäge liderları, tatar başqort rus oyışmalarınıñ citäkçeläre Ramil Bignov, Ayrat Dilmöxämmätov häm Anatoliy Dubovskiy Mäskäwneñ Bäysez matbuğat üzägendä oçraşu ütkärde. Alar oçraşuğa kilgän jurnalistlarğa Başqortstanda soñğı waqıtlarda kilep çıqqan wazxgiät xaqında söylädelär häm oppozitsiä aldında torğan plannar belän tanıştırdılar. Oppozitsiäneñ maqsatı ber, ul da bulsa Raximov rejimın alıp taşlaw didelär alar. Matubgat konferensiäsendä çığışı yasağan Ayrat Dilmöxämmätov Başqortstannıñ Blagoveşenskiy rayonında bulıp ütkän waqiğalarğa da tuqtalıp, omon ütkärgän bu çaralar, berkemgä kiräk bulmağan Çeçnyadağı suğışnıñ näticäse dip atadı. Häm ul Raximovnı xakimiättän çitläştergän oçraqta qanun buyınça respublika başlığın Rusiä federatsiäse prezidentı bilgelärgä tieş, läkin bez andıy qarar belän riza bulmayaçaqbız, çönki respublika başlığın xalıq qına saylap quyarğa tieş dide. Şul uq waqıtta dide Ayrat Dilmöxämätov, bez respublikanı gubernağa äyländerü digän fiker belän dä rizalaşmıybız, respublika isemen başqortlar qoral totıp yaulap aldı, ildä ber genä başqort qalğan oçraqta da bez respublika bulıp qalırğa tieş dide. Matbuğat oçraşuında çığış yasağan Başqortstan respublikası tatarları liderı Ramil Bignov şuşı aralarda ütkärelgän referendum näticäläre belän dä riza bulmawın belderde. Ğomumän, appozisiä plannarına qağılışlı başqa sorawlarğa da cawap birep, Rusiä prezidentı bezneñe möräcäğätlärgä qolaq sala, Başqortstan liderın bilgelägän waqıtta da bez kürsätkän nämzät belän kileşer dip uylıybız, dide. Şulay itep, başqort häm tatar oyışmaları citäkçeläreneñ fikerläre. Berençe qaraşqa ber tösle kürensä dä, qayber prinsipial mäsälälärdä ayırıla. Başqortlar liderı - Rusiä prezidentı täqdim itkän nämzät belän rizalaşmayäçäğın beldersä, tatarlar liderı bez Rusiä prezidentı belän kiñäşep eşlibez digän fikeren äytte. Alğa tabu bu fiker qarşılığı oppozitsiä arasında añlaşılmawçanlıq kiterep çığarmas mikän? Şulay uq matbuğat konferensiäsen oyıştırğan oppozitsiä liderları berse dä yalğışıp ta Räximov urınına kem nämzäten küzallawların beldermädelär. Alda torğan plannarına qarağanda alar Mäskäwdä tağı ber piket oyıştıraçaqlar. Anısı 7 aprel'dä Lubyanka mäydanında ütäçäk. Ä inde 1 maydan alar Ufada çatırlı şähär oyıştırıp,möddätsez piket açunı planlaştıralar. Mäskäwdä bulaçaq piketqa da Ufadan küp sanlı keşe kilergä tieş bulsa da, piketçılar aqça tüläp biletları alınğan oçqıçına Başqortstan xökümäte Mäskäwgä säfär yasarğa rizalıq birmägän. Ägär dä şul eş çişelmäsä, bez oçqıç mäydanına çığıp, barlıq oçıraqlarğa da Ufadan kitü mömkinlegen kisäçäkbez didelär oppozitsiä liderları.
Näzifä Kärimova “Azatlıq radiosı” Mäskäw.
