Qazanda bu könnärdä mäğärif ölkäsendä bik küp qızıqlı häm möhim waqiğalar bulıp tora. Çärşämbedä Tatarstannıñ Fän häm mäğärif ministrlığı häm Mäskäw ölkäseneñ Mäğärif Ministrlığı arasında xezmättäşlek turındağı kileşü imzalandı. Anı ministrlar Räis Şäyxleslamov häm Lidiä Antonova imzaladılar. Kileşü ike töbäk arasında mäğärif tarmağındağı xezmättäşlekne arttıru, uquçılar arasında elemtälär nığıtunı maqsat itep quya. Şulay uq, anda Mäskäw ölkäsendäge tatar balalarına ana telen öyrätüdä metodik yärdäm kürsätü, ölkä mäktäplären tatar telendä uqıtu programmaları, däresleklär belän tä’min itü qaralğan. Mäskäw ölkäsennän kilgän tatar balalarına respublikanıñ yuğarı uqu yortlarında tatar tele belgeçlege buyınça belem alu öçen kvotalar birergä kiräklege dä iskä alınğan.
Qazan yärminkäsendä isä 6 aprel’dän 8 qädär Mäğärif, karyera-2005 dip isemlängän maxsuslaştırılğan kürgäzmä ütä. Bu kürgäzmäneñ töp maqsatı – mäktäpne tämamlawçı yäşlärgä üzläreneñ kiläçäkläre turında uylanıp, alarğa döres yul saylawda yärdäm itü, Tatarstannıñ mäğärif ölkäsendäge mömkinçelekläre, mäğärif oyışmalarınıñ innovatsion eşçänlege häm respublikada törle belgeçleklärgä moxtaclıq belän tanıştıru. Uquçılar öçen bik möhim älege çaranı Tatarstannıñ Fän häm mäğärif, Yäşlär häm sport eşläre, Xezmät häm mäşğüllek ministrlıqları oyıştırğan. Mäğärif. Karyera-2005 kürgäzmäsenä bik küp qatnaşuçılar çaqırılğan. Alar arasında yuğarı häm urta maxsus uqu yortları, respublika külämendä iñ yaxşı dip tanılğan mäktäplär, litseylar häm gimnaziälär, näşriätlär, maxsus belem kütärü kursları, muzıkal’ häm estetik belem birü mäktäpläre, eş belän tä’min itü üzäkläre, törle kadrlar agentlıqları bar. Barısı anda 200gä yaqın uqu yortları, şirkät’lärdän 45 meñ tiräse keşe qatnaşa. Qatnaşuçılar respublikadan ğına tügel, ä Samar, Tol’yatti, Peterburg, Mäskäw şähärlärennän dä kilgän.
Şunısın da äytergä kiräk, bügenge köndä Tatarstanda räsmi räweştä 40 meñnän artıq eşsezlär terkälgän. Soñğı yıllarda alar arasında yuğarı häm maxsus urta belem birü uqu yortların tämamlawçılarnıñ sanı arttı. Bu, respublikanıñ Fän häm Mäğärif ministrı Räis Şäyxleslamov fikerençä, uqu yortlarında qayber belgeçlärneñ bik küp äzerlänüe, ä qayber hönärçelärne bötenläy äzerlämäwe näticäse. Şuña da, xäzer mäktäpne tämamlawçılarğa häm alarnıñ ata-analarına tege yäki bu belgeçlekne anıñ prestijlığı öçen genä tügel, ä kiläçäktä bu hönär buyınça eş tabıp bulamı, yuqmı ikänen isäpkä alıp ta eş itärgä kiñäş birde ministr. Räis Şäyxleslamov bu xaqta Exo Moskvı radiosınıñ cirle bülekçäsendä uzğan turı efir waqıtında söyläde. Şulay uq ul yäşlärgä yaxşı, töple belem alır öçen yaña açılğan küpsanlı kommersiä uqu yortların tügel, däwlätneñ bay tarixı häm fänni nigeze bulğan oyışmalarnı saylarğa kiñäş birde. Belgeçlär fikerençä, Rusiädä yaqın kiläçäktä kötelä torğan yuğarı belem birü tarmağındağı reformalar qısalarında älege kiñäş ayıruça qimmätle kürenä.
Yuğarı uqu yortları digännän, bıyıl respublikada alarnıñ kübesenä Berdäm däwlät imtixannarı näticäläre nigezendä kerep bulaçaq. Bu xaqta tulıraq mäğlümätne teläwçelär uqu yortlarınıñ üzlärendä beleşä ala. Aprel’ ayınnan başlap alarda Açı işek könnäre ütkärelä başlıy. Älege çara waqıtında abiturientlar uqu yortı, anda eşläwçe uqıtuçılar, ğalimnär belän tanışa, belgeçleklär, kerü imtixannarı xaqında soraşa ala.
Gölnaz İlgizär
