Accessibility links

Кайнар хәбәр

Bagdadnı yawlap alunıñ ike yıllığın Ğiraq başqalasında çit köçlärgä qarşı cıyın belän bilgeläp üttelär


Şimbä könne amerikan köçläreneñ Bagdadnı yawlap aluına ike yıl tuldı häm bu anda Ğiraq şığıylarınıñ ildä çit il ğäskärläre toruına qarşı häm Saddamnı mömkin qädär xökemgä tartunı taläp itkän zur uram cıyını belän bilgelände.

Mäğlüm şığıy ruxanie Moqtada äs-Sadrnıñ meñlägän tarafdarı başqala Bagdad uramnarı buylap, Amerikağa qarşı şiğarlär kütärep, "Basqaqlarğa - yuq, Ğiraqqa - äye!" dip qıçqırıp ütte:

Audio

Şuşı cıyın zur mäğnägä iä urında, Bagdadnıñ Firdüs mäydanında uzdı. Ul ike yıl elek bar dönyağa, şähärne äle genä basıp alğan amerikan köçläreneñ andağı Saddam häykälen cimerüe belän tanılğan ide. Şul çaqta Quşma Ştatlarnıñ saqlanu ministrı Donald Rumsfeld Bagdadnı Saddam köçlärennän azat itüne bar Ğiraqnıñ Saddamnan qotıluına tiñlägän ide:

Audio, Donald Rumsfeld

"Saddam Xösäyen xäzer Hitler, Stalin, Lenin, Ceausescu kebek eşläre kilep çıqmağan qanlı diktaorlar rätendä üzenä tieşle urının alaçaq, ä Ğiraq xalqı ireklek yulınnan baraçaq" digän ide ike yıl elek amerikan saqlanu ministrı Bagdadnı yawlap alu uñayınnan. Läkin şuşı ireklek belän ilgä şaqtıy totrıqsızlıq ta kilde, xalıqta Ğiraqnı tözekländerüneñ bik aqrın baruına qänäğätsezlek köçle. Bügenge cıyında qatnaşuçılarnıñ berse, "suğış inde ike yıl elek ük bette, şunnan soñ bezdä ni üzgärde soñ? Berni dä üzgärmäde, elektr yuq, xezmätlär yuq, berni yuq. İlebez barı tik terror oyasına ğına äylände" dip belderde. Ğisyançılar üz höcümnären här könne yasap tora, iminlek mäs''äläse Ğiraqta zur ber problema bulıp qala. Şimbä könne genä Bagdadnıñ könyağında 15 Ğiraq ğäskärieneñ mäyete tabıluı xaqında xäbär itelde, alar barısı da ğisyançılar tarafınnan üterelgän dip farazlana. Qayber küzätüçelär fikerençä, ğinwarda uzğan saylawlardan soñ ildäge wäzğiat alay da totrıqlana töşkän, çualışlar kimü yağına taba bara. Ğiraqtağı amerikan köçläre iminlek öçen cawaplılıqnı äkrenläp Ğiraq yağına tapşırıp kilä, şulay da älegä ildän çit il ğäskärlären qayçan çığaru waqıtı bilgelänmägän. Washington, amerikannar Ğiraqtan, andağı xakimiat iminlekne üze tä''min itä alırlıq xäldä bulğaç kitäçäk dip belderä. Bagdadtağı bügenge cıyında qatnaşuçılar monıñ belän kileşmi, anda "Basqaq köçlär ildän kitärgä tieş!" digän şiğarlär kürep bula ide. Alarnı şulay uq elekke diktator Saddamnı häm anıñ tirälegen xökem itüneñ haman da başlanmawı borçıy. Ğinwar saylawlarınnan soñ häm bu atnada Ğiraqta yaña prezident wä xökümät başlığı bilgelängännän soñ şimbä könne Bagdadta uzğan cıyın iñ zurısı buldı. Şığıy ruxanie äs-Sadrnıñ köçläre ber yıl elek amerikan ğäskärlärenä qarşı qorallı ğisyan oyıştırğan ide.

Kärim Kamal
XS
SM
MD
LG