Rusiäneñ elekke neft magnatı Mixail Xodorkovski östennän xökem eşläre tämamlandı. Xakim İrina Kolesnikova, xökem qararı 27 april könne iğlan iteläçäk, dip belderde.
Xodorkovski mäxkämädä, 10 ay däwam itkän xökem eşe waqıtında anıñ YUKOS citäkçese bularaq qanun bozğanına dälillär yä şaxitlär kiterelmäde, dip belderde. Üzeneñ ul, Rusiä xökümätenä "YUKOSnı talarğa" qomaçawlamasın öçen törmägä yabılğanın belderde:
"Yukosqa qarşı kampaniä täsirle keşelär tarafınnan, Rusiäneñ iñ uñışlı neft şirkäteneñ aqçasın alu öçen oyıştırıldı, monı böten il belä. Bu eştä alarğa qomaçawlamas öçen mine törmägä utırttılar, bu da böten ilgä mäğlüm."
Milke tuñdırılğançı, YUKOS Rusiä nefteneñ 5tän ber öleşen çığara ide.
Xodorkovski häm anıñ partnerı Platon Lebedevqa urlaw, aqça üzläşterü häm salım tülämäwdä ğayepläwlär belderelgän. Prokurorlar alarnıñ ikesenä dä iñ zur cäza – 10 yıllıq törmä birüne taläp itä. Xökem qararı aprilneñ 27sendä iğlan iteläçäk.
