Qazanda 21 aprel bäyräm köne bulmasa da, şähärdäge yullarda kierenkelek sizelde. Soñınnan belengänçä, Mäskäwdän Qazanğa zur törkem citäkçelär kilgän ikän, häm alar Qazandağı tözeşeleşlärne, yañartu eşlären qarap, başqa mäs’älälärne xäl itep yörgän bulğan.
Qazannıñ 1000 yıllığı bäyrämenä bulası çaralar abaylana başladı. İppodrom kompleksı, metro, 4nçe transport dambasın açu tantanaları,
Säydäşev isemendäge konsertlar zalında, şähär ratuşasında da çaralar ütkäreläçäk ikän. Härxäldä, Mäskäw qunaqlarınnan torğan törkem şuşı urınnarda bulğan. Delegatsiäne Rusiä Prezidentınıñ yärdämçese Aleksandr Abramov citäkli. Törkemdä tağın, Rusiä Prezidentı Vladimir Putinnıñ süzçese Aleksey Gromov, Prezident idäräseneñ protokol häm oyıştıru bülege citäkçese Marina Entaliseva häm başqalar bar. Qayber mäğlümatlarğa qarağanda, bu qunaqlar yörgän yullardan Rusiä Prezidentı häm başqa yuğarı däräcäle qunaqlar da yöriäçäk. Bäyräm çaraların ütkärü tärtibe turında may ayında, Sport Sarayı binasında açılaçaq xalıqara matbuğat üzäge xäbär itär äle. Qazannıñ 1000 yıllığı waqiğaların yaqtırtu öçen, distä meñ jurnalistnıñ kilüe kötelä. Şähärdä yäşärgä urın bulmaw säbäple, qunaqlarğa Qazan portına kitereläçäk köymälärdä yäşärgä täqdim itelä.
Rusiä Prezidentı idäräse xezmätkärläre belän bergä bu oçraşularğa Tatarstanğa Mäskäw İppodromı başlığı, at ürçetü fänni üzäkläre ğalimnäre dä çaqırılğan. Qazannıñ 1000 yıllığına bağışlanğan bäyräm çaralarda, Rusiä Prezidentı bülägenä at çabışları da planlaştırıla ikän. Bolar xaqında tulıraq mäğlümat 22nçe aprel’dä genä bilgele bula, çönki şul waqıtta ğına söyläşülär alıp barırğa kilgän Mäskäwlelär matbuğat oçraşuın ütkärergä teli.
Bikä Timerova.
