“Qazan” biyu ansamble üzeneñ yaña programmasın Ğ.Qamal teatrı säxnäsendä kürsätte. Konsertnı “Aygöl” balalar vokal ansamble häm “Qazan” biyu ansambleneñ biyu studiäse açıp cibärde. Konsertqa tamaşaçı bik küp kilgän ide. Ansambl' üzeneñ yaña programmasında, tamaşaçığa , tatar xalqınıñ ğöref-ğadätlären, milli kiemnären , tormışın çağıldırğan biyu kompozitsiäläre aşa täqdim itte. Şulay uq konsertnıñ berençe bülegendä başqarılğan Bolğar –Bilär mönäsäbätläre turındağı tarixi küreneşlär dä tamaşaçığa zur tä'sir qaldırdı. Dini tormışnı çağıldırğan mizgellär dä bik matur itep icat itelgän ide.Kostyumnarnıñ maturlığı , sänğät'lelege dä tamaşaçını bitaraf qaldırmadı. Bik küp iyüllär Räsim İl'yasov citäkçelegendäge “Qazan nurı” muzıka uyın qoralları ansamble uynawında başqarıla. Konsert berniçä bloktan tora. Här blok xalıq häm zaman kompozitorları icat itkän cırlar belän ürelep bara. Çit il xalıqları iyülläre dä bik matur quyılğan. Meksika iyülläre dä, ğäräp xalqı iyülläre dä tamaşaçığa därt östäde. Konsertta qatnaşqan cırçılar arasında kürenekle cırçılar Rämil Mindiär , Röstäm Zakirovlar da bar ide. Konsertqa kilgän tamaşaçı da törle illärdän kilgän delegatsiälärdän bulıp çıqtılar. Konsertqa Qazan tamaşaçısı ğına tügel , xätta Tol'yatti belän Tömännän kilgännär dä , yıraq İraq häm Braziliädän kilgännär dä bar ide. “Qazan” biyu ansambleneñ sänğät citäkçese Çulpan Zakirova söyli:
“Bez, ğomumän böten dönyanı äylänep yöribez. Menä 4 könnän böten kollektiv belän, 50 gä yaqın keşe, Qıtayğa oçabız . Programmanı tözüdä bik küp xoreograflar qatnaştı, alar arasında Fänis İsmağılovnıñ häm minem quyğan iyüllär dä bar ”,-dide ul. Konserttan soñ Tufan Miñnullin:
“Räxätlänep, bezneñ talantlı yäşlärebezneñ küp ikänenä söyenep qul çaptım. Bezneñ cır häm biyu ansamblenä menä digän konkurent bar. Ber- berse belän yarışıp üssennär. Bezneñ sänğät'ne tanısınnar .Räxmät alarğa. Yäşlär tatarlıqların häm tatar balalarınıñ talantlı ikänen belep üssennär.”,- dide ul. Qazan biyu ansambleneñ yaña programmasın bu atnada inde Qıtay tamaşaçısı kürä alaçaq.
Mälikä Basıyr.
