Qazan 1000 yıllığı bäyrämeneñ ber küñelle yağı bulsa, iminlek mäsälläre kebek qatlawlı yaqları da bar. Başqala tuğan köneneñ niçek ütüen xäzer uq küz aldına kiterep buldı. Qazan xärbi Garnizonı 27aprel könne uqular ütkärde. Qazannıñ näq üzäge, Kreml tiräse, Yärminkälär mäydanı, Bulaq yannarı tärtip saqlawçılar belän äyländerelep aldı. İrtänge säğätlärdä, şähär üzägendäge yullar yabıldı. Cämäğät transportı äylängeç yullardan cibärelde. Tärtip saqlawçılar äyländerep alğan uramnarda avtobuslarğa tuqtarğa röxsät itelmäde. Alar keşelärne berniçä tuqtalış yırağqraq arada ğına töşerep qaldıra aldı. Qomalıştağı uramnarda, cäyäw dä yörep bulmadı. Xätta «Azatlıq» radiosı xäbärçenä dä, şähär üzägeneñ ber yağınnan ikençe yağına cäyäü, uraw yullardan kilergä turı kilde. Qazannıñ tar uramnarı bik tiz arada, maşinalar belän tığıldı, bökelär xasil buldı. Küp keşelär barası urınnarına soñğa qaldı.
Kreml tiräsen, 10 metr sayın tsivil häm xärbi kiemnärdän kiengän tärtip saqlawçılar äyländerep aldı. Alar, öyränülär barğan cirgä ber kemne dä yaqın kitermäde. Kiçkä taba, Eçke eşlär ministrlığınnan 27 aprel’dä ütkärelgän öyränülär turında añlatmalı käğäz kilde. Anda äytelgänçä, Eçke eşlär ministrlığınıñ köçläre belän idärä itü Üzäge Qazannıñ 1000 yıllığın bäyräm itü barğan waqıtta eş alımnarın öyrängän bulğan. Mömkin terrorçılar rolen başqarğan törkem, şartlatqıç äyberlärgä oxşağan äyberlär belän, Piramida, Kreml, Üzäk Stadion häm başqa şundıy urınnarda bulğan. Mäğlümat çaraları öçen yasalğan belderüdä äytelgänçä, militsiä xezmätkärläre üzläreneñ yuğarı professional äzerlegen kürsätkän, terrorçılarğa plannarın tormışqa aşırırğa birmägän. Räsmi belderüdä tağın, militsiä xezmätkärläre ğadi qazanlılar belän itäğätle aralaşa aluın kürsättelär, dip bilgeläp ütelä.
öyränülärdä 1500 keşe qatnaşqan. Bu çarağa Qazannan arı, Çallı, Tübän Kama, Zäy häm başqa şähär, rayonnarnıñ militsiä xezmätkärläre dä cälep itelgän. Eçke eşlär ministrlığı mondıy öyränülärne, militsiäneñ professional äzerlegen arttıru öçen bik uñaylı yul itep isäpli. Külämle bäyräm çaralarınıñ Qazanda yış ütkärelüen iskä alsaq, andıy öyränülärneñ tağın qatalanuın da kötärgä bula.
Bikä Timerova.
