Soñğı 50 yıldan soñ Ğiraqta berençe demokratik saylanğan xökümät tözelde. Milli Mäcles premyer-ministr İbrahim al-Cağfari täqdim itkän ministrlar isemlegen xupladı: "Xökümät tözü yulında qan häm tir tügelde, bik küp süzlär buldı. Bügen bezneñ xalıq sezgä ışanıç belderde, bez üz wazifalarıbızda alğan cawaplılıqnı ütärgä tieşbez," dide Ğiraq premyerı. Tawış birüdä 275 äğzälek Milli Mäclesneñ 185şe qatnaştı. Alarnıñ 180ne ministrlarnı xuplap tawış birde. İsemlek äle tulı tügel dip xäbär itelä. Neft häm saqlanu ministrları kem bulaçağı xäl itelmägän. Saqlanu ministrı wazifasın waqıtlıça al-Cağfari üze başqaraçaq, neft ministrı urının şiği säyäsätçe Ahmed Çalabi alıp toraçaq. Yevropa Berlege häm Törkiä yaña Ğiraq xökümäte tözelüen xuplap çıqtı. Berlekneñ matbuğat wäkile Emma Udwin Brüsseldä, Yevropa Komissiäse Ğiraq ministrlarınıñ cıyıluına qänäğät, dip belderde. Berlek tizdän yaña küçeş çorı xökümäte belän söyläşülär uzdırırğa cıyına. Törkiä tışqı eşlär ministrlığı yasağan belderüdä, Änkara, yaña xökümätneñ Ğiraqta tärtip urnaştıru eşenä yärdäm itäçägenä ömet itä, dielgän.
