Accessibility links

Кайнар хәбәр

Putin Yaqın Könçığış säfären tämamladı: Mäskäw Fälästingä yärdäm kürsätäçäk


Yaqın Könçığış säfäre belän Misır häm İzraildä bulğannan soñ Rusiä prezidentı Vladimir Putin comğa könne Fälästin cirlärenä kilde. Ramallada Fälästin citäkçese Mäxmüt Abbas belän oçraşıp ul Fälästingä, Rusiäneñ, şul isäptän xärbi-texnik ölkädä, yärdämen täqdim itte. İzrail belän Quşma Ştatlarnıñ salqın mönäsäbätenä qaramastan, Putin, Mäskäwdä Yaqın Könçığış mäsäläsenä bağışlanğan oçraşu ütkärü fikeren qabatladı.

Rusiäneñ ğäräp illärenä, bigräk tä İzrailneñ kürşelärenä qoral satuına, İzrail, älbättä qarşılıq kürsätä. Kiçä İzraildä çağında, Vladimir Putin, bu il belän suğış xälendä bulğan Süriägä satılğan Rusiä qoralı İzrailgä qurqınıç tudırmıy, dip ışandırğan ide. Bügen Ramallada Fälästin citäkçese Mäxmüt Abbas belän säyläşülärdän soñ ütkän matbuğat oçraşuında ul Rusiäneñ Fälästingä xärbi-texnik yärdäm kürsätäçägen bolay añlattı:

Audio (Vladimir Putin)

"Ägär bez Abbas äfändeneñ terrorçılıqqa qarşı köräşüen telibez ikän, ul monı qulına taş totıp eşli almıy. Monı İzrail yağı da añlıy."

Putin süzlärençä, Rusiä Fälästingä beryatqan texnik yärdäm kürsätäçäk, boralaqlar, elemtä çaraları belän täemin itäçäk, ikençe yaqtan Fälästinneñ iminlek köçläre öçen Mäskäwdä künegülär oyıştırılaçaq. Alay da Putin bu yulı xärbi maşinalarnı telgä almadı. Rusiäneñ Fälästingä 50läp şundıy maşina tapşıru niätenä İzrail yağı, bu maşinalar bezgä qarşı qullanılaçaq dip, kisken qarşı çıqqan ide.

İzrail belän Quşma Ştatlar Rusiäneñ İranğa atom ölkäsendä yärdäm itüenä dä şiklänep qarıy, Tährannıñ atom qoral yasaw niätennän qurqa. Bu mäsälä matbuğat oçraşuında yänä kütärelde. Putin, Tährannıñ tınıç atom ölkäsendä eşläwen iskärtep bolay dide:

Audio (Vladimir Putin)

"Atom qoralınıñ taraluı, bigräk tä, Yaqın könçığış kebek töbäktä qurqınıç äyber. Xärbi yaqtan bu mäğnäsez, humanitar yaqtan – qabul itelmäslek."

Yaqın Könçığışta solıx urnaştıru söyläşülärendä Rusiä, Quşma Ştatlar, Yevropa Berlege häm Berläşkän Millätlär belän bergä 4 aradaşçınıñ berse bulıp tora. Çärşämbedä, üzeneñ säfäre başında, Kahirädä, Putin, şuşı yılnıñ közlärenä taba Mäskäwdä Yaqın könçığışqa bağışlanğan sammit ütkärü täqdimen yasağan ide. İzrail dä, Quşma Ştatlar da, bu täqdimgä salqın mönäsäbät belderde. Comğa könne Ramallada ütkän matbuğat oşraşuında Putin, andıy oçraşudan baş tartmawın, ämmä anıñ yuğarı däräcädä bulmasa, hiç yuğı belgeçlär däräcäsendä ütä aluın äytte.

Üzeneñ Yaqın Könçığış säfäre belän Putin qänäğät qaluın äytte. Bu säfären ul ğäräp ilendä başlap ğäräp cirendä tämamladı, arada yäxüd däwlätendä buldı. Här tarafnıñ küñelen kürde diergä bula.

-Ali Gilmi
XS
SM
MD
LG